გერმანიის მთავრობა აპირებს საქართველო და მოლდოვა უსაფრთხო ქვეყნებად გამოაცხადოს, რაც გაუადვილებს თავშესაფარზე უარის შემდეგ მათი მოქალაქეების დეპორტაციას. DW-ს ინფორმაციით, ფედერალური მთავრობა დღეს, 30 აგვისტოს გეგმავს შინაგან საქმეთა მინისტრ ნენსი ფეზერის მიერ წარდგენილი კანონპროექტის მხარდაჭერას.

მედიაჯგუფ Funke-ს გამოცემებთან ინტერვიუში ფეზერმა განაცხადა, რომ გერმანიაში თავშესაფრის მაძიებელთა შორის თითქმის ყოველი მეათე საქართველოდან და მოლდოვიდანაა ჩასული, ამ ქვენების უსაფრთხოდ აღიარება კი, ხელს შეუწყობს არალეგალური მიგრაციის სწრაფად და ეფექტიანად შემცირებას. გერმანიის შინაგან საქმეთა მინისტრმა არგუმენტად მოიყვანა ისიც, რომ საქართველოს და მოლდოვას ევროკავშირის წევრობა სურთ და ამ ქვეყნებში, როგორც წესი, ადამიანებს არ ემუქრება პოლიტიკური ნიშნით დევნა.

ნენსი ფეზერის ინფორმაციით, გერმანია გეგმავს საქართველოსა და მოლდოვასთან გააფორმოს მიგრაციასთან დაკავშირებული შეთანხმებებიც, რაც გერმანიაში ჩასვლის მსურველებს მისცემს განათლების მიღების და მუშაობის შესაძლებლობას და უზრუნველყოფს საქართველოსა და მოლდოვაში იმ მოქალაქეების სწრაფად დაბრუნებას, რომლებსაც გერმანიაში დარჩენის უფლება არ აქვთ.