ვფიქრობ, ეს არის გარკვეული პოლიტიკური ვირეშმაკობა, რომ არც მწვადი დაწვას, არც შამფური და ვითომ ოპოზიციაა, - ასე შეაფასა პოლიტოლოგმა, ვახტანგ ძაბირაძემ პარტია „გახარია საქართველოსთვის“ პოზიცია, რომლის თანახმად, პარტია მანდატების შეწყვეტაზე პარლამენტისთვის ამ ეტაპზე მიმართვას არ აპირებს.

ვახტანგ ძაბირაძის განცხადებით, ასეთ შემთხვევაში, პარტია „გახარია საქართველოსთვის“ ამ პარლამენტის ლეგიტიმურობას აღიარებს.

„ასეთი ამ ერთხელ უკვე გაკეთდა, ახალს ოპოზიცია ვერაფერს გვთავაზობს. 2008 წელს შალვა ნათელაშვილმა მანდატები დახია, მაგრამ მისი გუნდი პარლამენტიდან არ გამოსულა. არათუ არ გამოსულა, ხელფასებსაც იღებდა. გახარია ამ მხრივ ნოვატორი არ არის. რაც შეეხება იმას, რომ ვიღაცები პარლამენტში შევლენ, მათ მოისყიდიან და ასე შემდეგ, თავად გიორგი გახარიამ გააკეთა ისეთი განცხადება, რომელსაც არც მოსყიდვა უნდა - თუ არ ხევ მანდატს და არ გადიხარ, ე.ი. ამ პარლამენტის ლეგიტიმურობას აღიარებ. რატომ უნდა დასჭირდეს თვეები ამ გადაწყვეტილების მიღებას? ვფიქრობ, ეს არის გარკვეული პოლიტიკური ვირეშმაკობა, რომ არც მწვადი დაწვას, არც შამფური და ვითომ ოპოზიციაა. გახარიას განცხადება აბსურდული იყო, რომელიც ოპოზიციაზე საუბრობდა და თავად ფაქტობრივად, პარლამენტში შედის. თუ მას ეშინია, რომ თვითონ პარლამენტს გარეთ დარჩება და ვიღაცები შევლენ, მას შეეძლო ასეთი რამ ეთქვა, ჩვენ ყველაზე ბოლოს დავწერთ განცხადებას, როცა სხვები ამას გააკეთებენო. ოპოზიციამ ერთობლივი განცხადება უნდა გააკეთოს და ერთობლივად მიიღოს გადაწყვეტილება, შედის პარლამენტში თუ არა“, - განაცხადა ძაბირაძემ.

მისი განმარტებით, თუ დანარჩენი პოლიტიკოსები პარლამენტში არ შედიან, ეს იმას ნიშნავს, რომ ფაქტობრივად, ისინი პარლამენტის წევრები არიან და სხდომას არ ესწრებიან.

“ამას ბოიკოტი ჰქვია. შეუძლიათ ბოიკოტის რეჟიმში ყოფნა, მაგრამ თქვან, რომ ბოიკოტის რეჟიმში არიან და არა ის, რომ მათთვის ეს პარლამენტი მიუღებელია“,- განაცხადა ძაბირაძემ.

ცნობისთვის, პარტია „გახარია - საქართველოსთვის“ მანდატების შეწყვეტაზე პარლამენტისთვის ამ ეტაპზე მიმართვას არ აპირებს და არ გამორიცხავს, რომ "პროცესს რამდენიმე თვე" დასჭირდეს. აღნიშნულის შესახებ „პალიტრანიუსის“ გადაცემა „თავისუფალ სტუდიაში“ პარტიის „გახარია საქართველოსთვის“ პოლიტსაბჭოს წევრმა, გიორგი შარაშიძემ განაცხადა.

როგორც გიორგი შარაშიძემ აღნიშნა, საპარლამენტო მანდატების შეწყვეტაზე პარლამენტს მიმართავენ მაშინ, როდესაც „ყველაზე კარგი დრო იქნება“.

„ჩვენ პროცესთან გვაქვს საქმე, ეს ხომ არ არის ერთდღიანი, თუნდაც ერთკვირიანი ან ორკვირიანი პროცესი, შესაძლოა, ჩვენ ვიხილოთ თვეების განმავლობაში გაწელილი პროცესი, რომელსაც უბრალოდ ვერ გავექცევით. ამას როდის გავაკეთებთ? გავაკეთებთ მაშინ, როდესაც ამის ყველაზე კარგი დრო იქნება“, - განაცხადა გიორგი შარაშიძემ.