როგორც ევროპული გამოცემა Politico წერს, აშშ-ის ადმინისტრაციის წარმომადგენლებს შორის საკომუნიკაციო აპლიკაცია Signal-ის ჯგუფურ ჩატში მოკავშირეების შესახებ მიმოწერის გაჟონვამ აღშფოთება გამოიწვია ევროპასა და დიდ ბრიტანეთში. 

ბრიტანელი დიპლომატის თქმით, ლონდონი გაოგნებულია ვაშინგტონიდან ოფიციალურ პირებს შორის მიმოწერის შესახებ ინფორმაციის გაჟონვით. გაზეთის თანამოსაუბრემ ინციდენტს "სიგიჟე" უწოდა და ვარაუდობს, რომ ვიცე-პრეზიდენტი ჯეი დი ვენსი ევროპის მიმართ ამერიკის შეერთებული შტატების მტრული დამოკიდებულების იდეოლოგიის გამტარებელია, ამიტომ პრეზიდენტი დონალდ ტრამპი უფრო მკაცრ პოზიციას იჭერს, "რადგან მას არ სურს, რომ ვენსზე სუსტი ჩანდეს".

Politico აღნიშნავს, რომ ევროპელი მოკავშირეების იმედები, რომ ვაშინგტონის ადმინისტრაცია მათ მხოლოდ საჯაროდ აკრიტიკებს და პირადად თანაგრძნობას გამოუხატავს, გაქრა.

"გამომაფხიზლებელია ის, თუ როგორ საუბრობენ ევროპაზე, როცა ფიქრობენ, რომ მათ არავინ უსმენს. მაგრამ, ამავე დროს, გასაკვირიც არ არის. ჩვენ ვხედავთ მათ არგუმენტებს მთელი მათი არადიპლომატიური დიდებით", - განუცხადა გამოცემას ევროპელმა დიპლომატმა.

ანონიმური პირის კოლეგამ აღნიშნა, რომ ვაშინგტონის მიმართ ბრიუსელის ნდობა მნიშვნელოვნად შეირყა.

"ამჟამად, ხანდახან სასიამოვნო დიპლომატიური განცხადებების მიუხედავად, ნდობა დარღვეულია. ნდობის გარეშე გაერთიანება არ შეიძლება. ვფიქრობ, რომ ევროპამ გაცილებით მეტი უნდა გააკეთოს, რადგან სხვა არჩევანი არ არის", - თქვა ევროპელმა ოფიციალურმა პირმა.