„ეთიოპიის ტიგრაისა და ამჰარას რეგიონებში, გვალვის შედეგად გამოწვეული შიმშილის გამო, 400-მდე ადამიანი დაიღუპა,“ - განაცხადა ეთიოპიის ფედერალური ომბუდსმენის ინსტიტუტმა. 

ინსტიტუტის ინფორმაციით, მისი ექსპერტთა ჯგუფის შეფასებამ აჩვენა, რომ აღნიშნულ ორ რეგიონში მილიონობით ადამიანი დაზარალდა. ათიათასობით პირი კი იძულებით გადაადგილებულია.

,,გვალვით დაზარალებულ რაიონებში მცხოვრები ათასობით ბავშვი სკოლაში არ დადიოდა. გარდაცვალების შემთხვევები ბოლო ექვს თვეში დაფიქსირდა,“ - განუცხადა BBC-ს ინსტიტუტის ხელმძღვანელმა ენდელ ჰეილმა.

გასულ კვირას, ფედერალური მთავრობის საკომუნიკაციო ოფისმა განაცხადა, რომ ექვს მილიონზე მეტი ადამიანი გამოვლინდა, რომლებსაც, მომდევნო სამი თვის ფარგლებში, გადაუდებელი ჰუმანიტარული დახმარება სჭირდებათ.