ხელვაჩაურში ძმის მკვლელობის ბრალდებით დაკავებულ პირს ბათუმის საქალაქო სასამართლომ აღკვეთის ღონისძიების სახით პატიმრობა შეუფარდა.

ბრალდებულის ადვოკატი სასამართლოს 10 ათასი ლარის ოდენობით გირაოს სთავაზობდა. მოსამართლე ნინო სახელაშვილმა პროკურატურის შუამდგომლობა დააკმაყოფილა.

ძმის მკვლელობისთვის დაკავებულმა სასამართლოზე დუმილი დაარღვია. 35 წლის რამაზ ლორთქანიძე დანაშაულს აღიარებს.

"ძალიან ცუდი რამ ჩავიდინე, აფექტურ მდგომარეობაში ვიყავი. არ მინდოდა ასე მომხდარიყო, მაგრამ განგებამ ასე ისურვა. ძალიან ცუდი რამ ჩავიდინე, ძალიან ვნანობ, რა ვთვა არ ვიცი" - განაცხადა რამაზ ლორთქანიძე.

ცნობისთვის, 2 ივნისს ხელვაჩაურში ძმამ ძმა სანადირო თოფით მოკლა. მამაკაცი სამართალდამცველებმა ცხელ კვალზე დააკავეს. როგორც ცნობილია, მკვლელობას წინ შელაპარაკება უძღოდა.