დიდი ქართველი პოეტის შოთა რუსთაველის  ქანდაკების გახსნა მნიშვნელოვანი მოვლენაა ჩინური და ქართული ენებისა და კულტურების ურთიერთშესწავლის საქმეში, - ამის შესახებ ჩინეთის სახალხო რესპუბლიკის განათლების მინისტრის მოადგილემ უ იენმა განაცხადა.

მისი თქმით, ჩინეთი და საქართველო ყოველთვის ინარჩუნებდნენ მეგობრული ურთიერთობის დინამიკას.

„მივესალმები მის აღმატებულებას, საქართველოს პრემიერ-მინისტრს ირაკლი ღარიბაშვილს, მის აღმატებულებას, ვიცე-პრემიერს ლევან  დავითაშვილს, მის  აღმატებულებას, მინისტრ ილია დარჩიაშვილს, მინისტრ გიორგი ამილახვარს, მინისტრ ოთარ შამუგიას, ელჩ არჩილ  კალანდიას, ქალბატონებო და ბატონებო, ძვირფასო მეგობრებო და პატივცემულო სტუმრებო, არსებობს ორი ძველი ჩინური გამონათქვამი. ერთის თანახმად, როცა ყველაზე გამორჩეული სტუმრები ჩამოდიან, სწორედ მაშინ წვიმს. მართლაც ასეა. მეორე გვასწავლის, რომ სიამოვნების მომგვრელია შორიდან ჩამოსული მეგობრები,  ხოლო  ყველაზე გამორჩეულნი ჩვენთან  სახლში მოდიან და ყველას გვაბედნიერებენ.  შეიძლება ითქვას, რომ ეს ორი გამონათქვამი საუკეთესოდ ასახავს იმ ფაქტს, რომ საქართველოს პრემიერ-მინისტრი ხელმძღვანელობს ამ უნივერსიტეტში საქართველოს ყველაზე გამორჩეული სტუმრებისგან შემდგარ დელეგაციას.

ამიტომ, ჩინეთის სახალხო რესპუბლიკის განათლების სამინისტროს სახელით, მინდა მივესალმო მის აღმატებულებას, საქართველოს პრემიერ-მინისტრს და მის დელეგაციას ჩინეთის უნივერსიტეტებში ვიზიტის ფარგლებში.

გულწრფელ მადლობას ვუხდი ასევე მეგობრებს  ყველა სფეროდან, როგორც სახლში, ისე მის ფარგლებს გარეთ, რომლებიც დიდი ხნის განმავლობაში მტკიცედ უჭერდნენ მხარს ჩინეთ-საქართველოს საგანმანათლებლო თანამშრომლობას. მინდა გულწრფელი მადლობა გადავუხადო პეკინის ენისა და კულტურის უნივერსიტეტს (BLCU) ამ ღონისძიების ორგანიზებისთვის.

ჩინეთი და საქართველო ყოველთვის ინარჩუნებდნენ მეგობრული ურთიერთობის დინამიკას. ეს მიუთითებს ჩვენთვის მნიშვნელოვან მიმართულებაზე - ხელი შევუწყოთ ჩინეთსა და საქართველოს შორის მეგობრულ განწყობებს.

ჩინეთისა და საქართველოს განათლების სისტემები ყოველთვის ინარჩუნებდნენ მჭიდრო თანამშრომლობას. 2001 წელს საგანმანათლებლო თანამშრომლობის შესახებ შეთანხმების ხელმოწერის შემდეგ, მხარეებმა დაგეგმეს და განახორციელეს მრავალფეროვანი თანამშრომლობისა და გაცვლითი პროგრამების მთელი  სერია, რამაც მნიშვნელოვანი და დადებითი წვლილი შეიტანა ორ ქვეყანას შორის განათლების და მეგობრული განწყობების განვითარებაში. დიდი ქართველი პოეტის შოთა რუსთაველის  ქანდაკების გახსნა მნიშვნელოვანი მოვლენაა ჩინური და ქართული ენებისა და კულტურების ურთიერთშესწავლის საქმეში.

ახალგაზრდა სტუდენტებმა ჩინეთიდან და საქართველოდან შეინარჩუნეს მრავალფეროვანი ურთიერთობისა და ურთიერთსწავლების ტრადიცია. ახალგაზრდები არიან ჩინეთ-საქართველოს მეგობრობის მემკვიდრეები, პრაქტიკოსები და ხელშემწყობები, - აწ უკვე თაობიდან თაობამდე. მიჩნეულია, რომ ორ ქვეყანას შორის საგანმანათლებლო თანამშრომლობის გაღრმავებასთან ერთად, მეტი გაცვლითი პროგრამა შეიქმნება და განხორციელდება ჩინეთსა და საქართველოს ახალგაზრდებს შორის და ორი ქვეყნის ახალგაზრდები ამგვარად იმუშავებენ ერთად ჩინეთ-საქართველოს მეგობრობის მეტაფორული ხის დასაცავად, რაც თაობიდან თაობას გადაეცემა“, - განაცხადა ჩინეთის სახალხო რესპუბლიკის განათლების მინისტრის მოადგილემ.