გერმანიის კანცლერობის კანდიდატმა და „ქრისტიან-დემოკრატიული კავშირის“ ლიდერმა, ფრიდრიხ მერცმა გააკრიტიკა ილონ მასკი მისი სტატიის გამო, რომელშიც მან შეაქო პარტია „ალტერნატივა გერმანიისთვის“.

„დასავლური დემოკრატიების ისტორიაში მეგობარი ქვეყნის საარჩევნო კამპანიაში ჩარევის მსგავსი შემთხვევა არ მახსოვს“, - აღნიშნა ფრიდრიხ მერცმა.

ფრიდრიხ მერცმა კომენტარი მას შემდეგ გააკეთა, რაც გერმანულმა გაზეთმა Welt am Sonntag-მა გამოაქვეყნა ილონ მასკის სტატია, რომელშიც მასკმა პარტია „ალტერნატივა გერმანიისთვის“ (AfD) შეაფასა, როგორც „იმედის ბოლო ნაპერწკალი“ გერმანიისთვის.

აღნიშნული სტატია გააკრიტიკეს გერმანელმა დეპუტატებმა, როგორც გერმანიის დემოკრატიულ პროცესებში ჩარევის აშკარა მაგალითი.