მიხეილ სააკაშვილი უკრაინელ ხალხს მიმართავს და აცხადებს, რომ ქართულმა სასამართლომ მას სიკვდილი მიუსაჯა.  

მისივე თქმით, უკრაინა ძალიან მოენატრა და იმედი აქვს, რომ კიევსა და ოდესაში მალე დაბრუნდება.

„დღეს ქართულმა „სასამართლომ“ პრაქტიკულად სიკვდილი მომისაჯა მას შემდეგ, რაც თითქმის ყველა ექიმმა, მათ შორის რამდენიმე მსოფლიო ექსპერტმა, ერთხმად დაასკვნა, რომ თუ ქართულ ციხეში დავრჩები, აუცილებლად მოვკვდები.

ჩემო ძვირფასო თანამოქალაქეებო, ძალიან მომენატრეთ და დარწმუნებული ვარ ჩვენს გამარჯვებაში. ამ იმპერიას რამდენიმე ათეული წელია ვებრძვი და არა მარტო საქართველოში, არამედ უკრაინაშიც, დაწყებული გრანიტის რევოლუციით, ორი მეიდანით და ჩემი მოღვაწეობით ოდესაში მისთვის ძალიან კრიტიკულ პერიოდში.

მე ძალიან ვამაყობ, რომ ვარ პრეზიდენტი ზელენსკის ამჟამინდელი მრჩეველი, რომელსაც ვთვლი კაცობრიობის ისტორიაში ერთ-ერთ უდიდეს ლიდერად. ის არ არის უბრალოდ დიდი პოლიტიკოსი, მაგრამ ჩემს მიმართ და სხვა ბევრის მიმართ მან აჩვენა, რომ ძალიან დიდი გული აქვს.

მე ძალიან მადლობელი ვარ ანდრეი ერმაკის და მთელი ოფისის, რომ შექმნეს დიდი საერთაშორისო კოალიცია ჩემი გათავისუფლებისთვის.

რა თქმა უნდა, მე ვარ პუტინის პირადი პატიმარი. ბოლო რამდენიმე კვირის განმავლობაში ლავროვი თავის ინტერვიუებში აქებდა საქართველოს მთავრობას და იმავე ინტერვიუებში მლანძღავდა მე და, რა თქმა უნდა, უკრაინას.

მეგობრებს უბედურებაში იცნობენ და თავისუფლებისა და სიცოცხლისთვის ბრძოლაში ვიპოვე ნამდვილი მეგობრები მინისტრ კულებადან დმიტრო ლიუბინეცამდე, ბევრი უკრაინელი ჟურნალისტი და რიგითი ხალხი.

მე ვარ პუტინის პირადი პატიმარი. მისი ბრძანებით მომწამლეს, მაწამეს, მაგრამ პუტინისა და იმპერიის დასასრული ისე ახლოსაა, როგორც არასდროს. ჩვენ უნდა გავმაგრდეთ, ჩემო ძვირფასებო!

ძალიან მიყვარს უკრაინა... კიევი ჩემი ქალაქია. ოდესაც ჩემი ქალაქია, რომელიც ძალიან მენატრება. ჩემი გული უკრაინას ეკუთვნის და ჩვენ აუცილებლად დავამარცხებთ ამ მტერს და ვიქნებით საუკეთესო ქვეყანა ევროპაში, რაზედაც ყოველთვის ვოცნებობდი“, - აცხადებს სააკაშვილი.

ცნობისთვის, სააკაშვილისთვის სასჯელის გადავადებაზე სასამართლომ უარი თქვა.