ბელარუსის სახელმწიფო ტელეკომპანია „ბელარუსი 1“  საქართველოს მოქალაქის გიორგი ზირაქაშვილის დაკავების შესახებ იუწყება. 

მათი ინფორმაციით, მას, თითქოს, უკრაინაში წასვლა და უკრაინის შეიარაღებული ძალების მხარეზე ბრძოლა სურდა. ამავდროულად, ბელარუსული არხის წამყვანებმა მინსკში უკრაინის საელჩო ომისთვის ხალხის გადაბირებაში დაადანაშაულეს. ამის შესახებ რადიო თავისუფლების ბელორუსული სამსახური წერს.

სიუჟეტში ნათქვამია, რომ 36 წლის მამაკაცი პოლონეთში ცხოვრობდა და ტაქსის მძღოლად მუშაობდა.

გავრცელებული ინფორმაციით, ზირაქაშვილმა საქართველოში ყოფნისას გადაწყვიტა „ქართულ ლეგიონში“ გაწევრიანება და უკრაინის მხარეზე ბრძოლა. ქვეყნის საელჩომ მას ურჩია უკრაინაში ბელარუსის, პოლონეთის ან მოლდოვის გავლით წასულიყო. ბელარუსში უშიშროების ძალებმა ქართველი დააკავეს.