ბაკურიანში გუშინ მომხდარი უბედური შემთხვევისას დაშავებულ 15 წლამდე გოგონას სიცოცხლეს საფრთხე არ ემუქრება. 

არასრულწლოვანი სასწრაფო დახმარების ბრიგადამ თბილისში გადმოიყვანა. მას ფეხი აქვს მოტეხილი.

შეგახსენებთ, რომ გუშინ, 19 იანვარს, ბაკურიანში, სათხილამურო ტრასაზე 40 წლამდე კაცი დაიღუპა. 

ის, სავარაუდოდ, მაღალი სიჩქარით მოძრაობდა და წონასწორობა ვეღარ დაიმორჩილა. გავრცელებული ინფორმაციით, დაშავებული და დაღუპული სრიალისას ერთმანეთს შეეჯახნენ.

მომხდარზე გამოძიება სისხლის სამართლის კოდექსის 116-ე მუხლით მიმდინარეობს, რაც გაუფრთხილებლობით სიცოცხლის მოსპობას გულისხმობს.

გარდაცვლილია გიორგი ტუხაშვილი. მას მეუღლე და მცირეწლოვანი შვილები დარჩა.