ამ წუთებში ზუგდიდის რაიონულ სასამართლოში, „საქართველოს ბანკის“ ყაჩაღობაში ბრალდებულ ბადრი ესებუას სასამართლო პროცესი მიმდინარეობს. სხდომას თავად ბრალდებულიც ესწრება.

ცნობილია, რომ დღევანდელ სხდომაზე „საქართველოს ბანკის“ თანამშრომლები დაიკითხებიან. საუბარია 9 პირზე, ვინც ესებუას მძევლად ჰყავდა. ასევე დღეს დაცვის მხარემ უნდა დააფიქსიროს საკუთარი პოზიცია ბრალდების მხარის შუამდგომლობასთან დაკავშირებით.

ადვოკატის ინფორმაციით, ისინი მზად არიან ბრალდებულისთვის ნიმუშების აღება მოხდეს, თუმცა პროცესში ჩართავენ საკუთარ სპეციალისტს. საუბარია ბრალდებულისთვის ფონოსკოპიური, ოდოროლოგიური ნიმუშების აღება და ფსიქიატრიული ექსპერტიზის ჩატარება, რომლის შუამდგომლობაც ბრალდების მხარემ წინა სასამართლო სხდომაზე დააყენა.