აშშ-ის საელჩო კიევში უკრაინის დამოუკიდებლობის დღესთან დაკავშირებით, რომელიც 24 აგვისტოს აღინიშნება, რუსეთის შესაძლო საჰაერო თავდასხმის შესახებ იუწყება და საკუთარ მოქალაქეებს აფრთხილებს.

“აშშ-ის საელჩო კიევში თვლის, რომ მომდევნო რამდენიმე დღეში და უქმეებზე უკრაინის მთელ ტერიტორიაზე 24 აგვისტოს უკრაინის დამოუკიდებლობის დღესთან დაკავშირებით, როგორც დღისით, ასევე ღამე რუსული უპილოტო საფრენი აპარატებისა და რაკეტების გამოყენებით შეტევის რისკი იზრდება“, - ნათქვამია განცხადებაში.

საელჩო მოუწოდებს საკუთარ მოქალაქეებს თვალყური ადევნონ ადგილობრივ მედიას, მოიძიონ ინფორმაცია არსებული თავშესაფრების შესახებ, საჰაერო განგაშის დროს დაუყოვნებლივ ჩავიდნენ თავშესაფარში და მიჰყვნენ უკრაინის ოფიციალური პირების მითითებებს.