აშშ-ის პრეზიდენტის, დონალდ ტრამპის სპეციალური წარმომადგენელი ახლო აღმოსავლეთში სტივ უიტკოფი მოსკოვში ჩაფრინდა. ინფორმაციას რუსული მედია ავრცელებს.

უიტკოფი მოსკოვში კატარის დედაქალაქ დოჰადან ჩაფრინდა. მედია ვარაუდობს, რომ ტრამპის სპეცწარმომადგენელი რუსეთის ხელისუფლების წარმომადგენლებს საუდის არაბეთის ქალაქ ჯიდაში უკრაინულ მხარესთან მიღწეულ 30-დღიანი დროებითი ზავის შესახებ ინფორმაციას გადასცემს.

ცნობისთვის, აშშ-ისა და უკრაინის დელეგაციებმა 11 მარტს საუდის არაბეთის ქალაქ ჯიდაში მოლაპარაკებები გამართეს. მოლაპარაკებების შედეგად უკრაინა დათანხმდა 30-დღიან დროებით ცეცხლის შეწყვეტის წინადადებას. ამერიკა საპასუხოდ კიევისთვის სამხედრო დახმარებისა და სადაზვერვო ინფორმაციის გადაცემას განაახლებს.