40 წუთის განმავლობაში რუსეთის ფედერაცია ერთხელაც არ გიხსენებიათ ომის მწარმოებელი აგრესორი ქვეყნის კონტექსტში - მტერი, ბატონო ირაკლი, მტერია რუსეთის ფედერაცია,- ასე მიმართა პარტია „საქართველოსთვის“ დეპუტატმა ბექა ლილუაშვილმა საქართველოს პრემიერ-მინისტრ ირაკლი ღარიბაშვილს პარლამენტის პლენარულ სხდომაზე, სადაც მას ინტერპელაციის წესით უსმენენ.

როგორც ლილუაშვილმა აღნიშნა, ღარიბაშვილმა საკუთარი გამოსვლისას პროპაგანდისტ „სიმონიანების“ ფუნქცია შეასრულა.

„40 წუთის განმავლობაში რუსეთის ფედერაცია ერთხელაც არ გიხსენებიათ ომის მწარმოებელი აგრესორი ქვეყნის კონტექსტში. ახსენეთ დიდი გამოწვევა, საბრძოლო მოქმედებები, ნომერ პირველი ბირთვული სახელმწიფო - მტერი, ბატონო ირაკლი, მტერია რუსეთის ფედერაცია, მაგრამ თქვენ თქვენი ფუნქცია ფანტასტიკურად შეასრულეთ, ომის სურათი დაუხატეთ ქართულ საზოგადოებას, მოახდინეთ ქართული საზოგადოების შიშების გაღვივება. ეს ფუნქცია გქონდათ, „სიმონიანები“ რომ აცხადებენ ხოლმე რუსეთის პროპაგანდისტული არხებიდან, რომ თბილისის მიმართულებით რაკეტები გამოფრინდება, ეს ფუნქცია შეასრულეთ - თქვით რადიკალებზე, ექსტრემისტებზე, ახალგაზრდებზე, რომლებიც რუსთაველის გამზირზე მშვიდობიანად იდგნენ და გამოხატავდნენ პროტესტს, საკუთარი მომავლის წართმევასთან მიმართებით. საზოგადოებაში შიშის გაღვივება, საზოგადოების დაპირისპირება, ამ მოტივებზე დაფუძნებული რიტორიკა ყოველთვის რუსეთის საქმე იქნება, ეს ასეა, როგორც არ უნდა ეცადოთ, რომ შეცვალოთ“,- მიმართა ბექა ლილუაშვილმა ირაკლი ღარიბაშვილს.