ევროკავშირი მოუწოდებს ყველა პასუხისმგებლიან აქტორს, თავიდან აიცილონ ვითარების დესტაბილიზაცია. ამასთან, ბრიუსელში მიესალმებიან მოლდოვის რესპუბლიკის თავშეკავებულ რეაქციებს, რაც ეხმარება ქვეყანაში სიმშვიდის შენარჩუნებაში.

„ევროკავშირი სოლიდარულია მოლდოვისადმი და ადასტურებს ურყევ მხარდაჭერას მოლდოვის რესპუბლიკის სუვერენიტეტისა და ტერიტორიული მთლიანობისადმი საერთაშორისოდ აღიარებული საზღვრების ფარგლებში და დნესტრისპირეთის რეგიონისთვის სპეციალური სტატუსით“, – აღნიშნულია ბორელის განცხადებაში.

განცხადების თანახმად, უკრაინის წინააღმდეგ რუსეთის აგრესიის შედეგებთან გამკლავებაში მოლდოვის მხარდასაჭერად, ევროკავშირი მოლდოვას აწვდის ყოვლისმომცველ დახმარებას ლტოლვილთა ნაკადით გამოწვეული მყისიერი გამოწვევების მოსაგვარებლად, ასევე ევროკავშირმა გააძლიერა მოლდოვის საერთო მდგრადობის გასამტკიცებლად საშუალოვადიანი მხარდაჭერა.

შეგახსენებთ, რომ მოლდოვის თვითგამოცხადებული დნესტრისპირეთის რეგიონში ბოლო დღეებში აფეთქებების სერია მოხდა. მოლდოვის ხელისუფლება მომხდარს სავარაუდო პროვოკაციად აფასებს, რომლის მიზანია რეგიონში ვითარების დესტაბილიზაცია.