„ჩვენ ავუსრულეთ მინისტრს სურვილი და ოცნება, რომ ევროპაში მოძებნილიყო რომელიმე ქვეყანა, რომელიც სახელმწიფო ბიუჯეტიდან აფინანსებს ამ მედიკამენტს - ეს ქვეყნებია ესპანეთი, იტალია და ჩეხეთი. აიღონ ჩეხეთის მოდელი, სადაც სახელმწიფო აფინანსებს ამ მედიკამენტს“, - ამის შესახებ აქონდროპლაზიის მქონე ერთ-ერთი ბავშვის მშობელმა მთავრობის ადმინისტრაციასთან ჟურნალისტებს განუცხადა.

მშობლები ჯანდაცვის მინისტრ ზურაბ აზარაშვილს მოუწოდებენ, სასწრაფო წესით შემოიტანონ ქვეყანაში მედიკამენტი ვოსორიტიდი.

„ყველა ქვეყანაში, სადაც ამჟამად წარმატებით მკურნალობენ ამ მედიკამენტით, საერთოდ არ ყოფილა ჯანდაცვის მსოფლიო ორგანიზაციის რეკომენდაცია. გარდა ამისა, სპინალური კუნთოვანი ატროფიის წამალი ისე შემოიტანეს საქართველოში და ისე გადაიხადეს სახელმწიფო ბიუჯეტიდან 5 მილიონ ნახევარი, რომ არანაირი ჯანმოს რეკომენდაცია მას არ ჰქონია. ასე რომ, ჯანმო ამ შემთხვევაში, ჩვენ არ გვჭირდება, ჩვენ გვჭირდება წამალი, ჯანმოს გარეშე, რაც შეიძლება სწრაფად. სამ კვირაში თუ „გაიდლაინი“ მზად იქნება, ჯანდაცვის სამინისტროს უნდა ჰქონდეს გაფორმებული ხელშეკრულება, რომ ყველაზე გვიან, ივნისის თვეში ეს მედიკამენტი შემოიტანონ ბავშვებისათვის. ამ საკითხის გადაწევა სექტემბრამდე საერთოდ არ არის საჭირო. მინისტრს სურვილი და ოცნება, რომ ევროპაში მოძებნილიყო რომელიმე ქვეყანა, რომელიც სახელმწიფო ბიუჯეტიდან აფინანსებდა ამ მედიკამენტს, ჩვენ ავუსრულეთ - ეს ქვეყნები არის ესპანეთი, იტალია და კიდევ, ჩეხეთის მოდელი, სადაც სახელმწიფო აფინანსებს საკუთარი ბიუჯეტით. აიღონ ჩეხეთის მოდელი, სასწრაფოდ შემოიტანონ მედიკამენტი, ნუ გვიწელავს დროში. ველოდებით მედიკამენტს. უსწრაფესი წესით მოვითხოთ მედიკამენტის შემოტანას საქართველოში“, - ამბობს აქონდროპლაზიის მქონე ბავშვის დედა. 
ცნობისთვის, დღეს აქონდროპლაზიის საკითხზე მომუშავე საკოორდინაციო საბჭოს სხდომა გაიმართა. სხდომის დასრულების შემდეგ, ჯანდაცვის მინისტრის მოადგილემ თამარ გაბუნიამ ჟურნალისტებს განუცხადა, რომ ჯგუფის წევრებმა „გამოთქვეს თავიანთი პოზიციები და განაცხადეს, რომ ტექნიკური მზაობა აქვთ, რათა პროტოკოლი ერთი თვის განმავლობაში ჩამოაყალიბონ“.

ხოლო კითხვაზე, - მიიღებენ თუ არა აქონდროპლაზიით დაავადებული ბავშვები მედიკამენტს, თამარ გაბუნიამ განაცხადა: „ამ გადაწყვეტილებას გარკვეული დრო დასჭირდება“.

აქონდროპლაზიის მქონე ბავშვების მშობლების განცხადებით, წამალი ვოსორიტიდი, რომლის ერთწლიანი დოზა დაახლოებით 200 000 დოლარი ჯდება, საქართველოში სულ 16 ბავშვს სჭირდება. წელიწად-ნახევარია, აქონდროპლაზიის სამკურნალო მედიკამენტის დაფინანსებას მოითხოვენ.