აბრძანდით ფეხზე და ახლავე ბოდიში მოუხადეთ ვალერი გელაშვილს, კობა დავითაშვილის ოჯახს, ესენი იყვნენ თქვენი პოლიტიკური ოპონენტები, რომელიც მოიტაცეთ, დაამტვრიეთ და დალეწეთ ცემით მხოლოდ იმის გამო, რომ არ გეთანხმებოდნენ, – ასე მიმართა საქართველოს პარლამენტის თავმჯდომარის მოადგილემ, არჩილ თალაკვაძემ „ნაციონალური მოძრაობის“ წევრებს პარლამენტში პრემიერ-მინისტრის ყოველწლიური ანგარიშის შემდეგ გამართული პოლიტიკური დებატებისას.

როგორც არჩილ თალაკვაძემ აღნიშნა, ძალადობა არის „ნაციონალური მოძრაობის“ პოლიტიკური კოდი.

„თქვენ თუ მართლა ემიჯნებით ძალადობას, თუ მართლა გაწუხებთ ძალადობა, აგერ 10 წელი არის უკვე გასული, ახლავე აბრძანდით ფეხზე, თუ არადა, ჩავთვლი, რომ მატყუარა და ფარისევლები ხართ. აბრძანდით ფეხზე და ახლავე ბოდიში მოუხადეთ ვალერი გელაშვილს, კობა დავითაშვილის ოჯახს, ესენი იყვნენ თქვენი პოლიტიკური ოპონენტები, რომელიც მოიტაცეთ, დაამტვრიეთ და დალეწეთ ცემით მხოლოდ იმის გამო, რომ არ გეთანხმებოდნენ. ძალადობას თუ არ ეთანხმებით, აბრძანდით, ბოდიში მოიხადეთ და თქვით, რომ ეს იყო საზიზღრობა და კანონის ძალიან მძიმე დარღვევები, მაგრამ არ ხართ მაგის გამკეთებლები, რადგან კარგად იცით, ძალადობა არის ზუსტად თქვენი პოლიტიკური კოდი. გიორგი ვაშაძეს რომ ვუსმინოთ, მარტო ქართველი ხალხი გვიჭერს მხარს, დანარჩენი თურმე ყველა ჩვენ გვაკრიტიკებს და ყველა ჩვენ წინააღმდეგ არის. აი, მაგ ლოგიკით რომ მოდიხართ ყველა არჩევნებზე, იმიტომ ხართ ერთპროცენტიანები და იმიტომ ვერ აკეთებთ ვერაფერს. ხან ვის ფანჩატურში იკრიბებით, ხან ვინ მოგიწოდებთ ქოლგის ქვეშ შემოსვლას და ცალ-ცალკე გინდათ, რომ გაიმარჯვოთ. ვერ გაიმარჯვებთ, ვიდრე არ მიხვდებით, რომ ქართველ ხალხში არის ლეგიტიმაცია. გარეთ სირბილს, სჯობს შიგნით იაროთ და ხალხს შეხვდეთ“, – განაცხადა თალაკვაძემ.