წლის ბოლოს, სტამბოლში, უკრაინაში მშვიდობის მისაღწევად მესამე საერთაშორისო შეხვედრა იგეგმება. ამის შესახებ Bloomberg წყაროებზე დაყრდნობით წერს.
გამოცემის ცნობით, მონაწილეები განიხილავენ იდეებს უკრაინაში ხანგრძლივი მშვიდობის მისაღწევად. შეხვედრას, სავარაუდოდ, დაესწრებიან ეროვნული უსაფრთხოების მრჩევლები სხვადასხვა ქვეყნიდან, მათ შორის შეერთებული შტატებიდან. ასევე, Bloomberg-ის წყაროების ცნობით, მათ სურთ სამიტზე ჩინეთის ხილვა, მაგრამ ჯერჯერობით უცნობია, გაგზავნის თუ არა პეკინი წარმომადგენელს.
რუსეთი არ არის მიწვეული შეხვედრაზე - ისევე როგორც წინა შეხვედრაზე, რომელიც ზაფხულში დანიასა და საუდის არაბეთში გაიმართა. რუსეთის საგარეო საქმეთა სამინისტრომ ამ უკანასკნელს „ანტირუსული კოალიციის შექმნის მცდელობა“ უწოდა.
უკრაინა და მისი მოკავშირეები ცდილობენ დაარწმუნონ ქვეყნები, რომლებიც ნეიტრალურები არიან რუსული აგრესიის მიმართ, დაუპირისპირდნენ მოსკოვს. ასეთი შეხვედრები უკრაინისთვის განიხილება, როგორც შესაძლებლობა, პირდაპირ აუხსნას თავისი პოზიცია ამ ქვეყნებს - Bloomberg მათ შორის ბრაზილიასა და ინდოეთს ასახელებს.
სტამბოლში მოახლოებული მოლაპარაკებების დღის წესრიგში არის უკრაინის პრეზიდენტის ვლადიმერ ზელენსკის ათპუნქტიანი გეგმა, რომელიც ცნობილია როგორც „მშვიდობის ფორმულა“. სხვა საკითხებთან ერთად, მასში შედის რუსული ჯარების გაყვანა უკრაინის საერთაშორისოდ აღიარებული ტერიტორიიდან, პატიმრების გათავისუფლება და ქვეყნის ბირთვული, საკვები, ენერგეტიკული და ეკოლოგიური უსაფრთხოების უზრუნველყოფა.
მოლაპარაკებების შემდეგ უკრაინა იმედოვნებს, რომ წლის ბოლომდე გამართავს სამიტს, რომლის დროსაც, უკრაინის მოთხოვნების საფუძველზე, ერთობლივი სამშვიდობო ინიციატივა ჩამოყალიბდება.
0
0
