როდესაც ვფიქრობდი რომ არიან ადამიანები, რომელთა დისტანცირება უკეთესი იქნებოდა ოპოზიციისთვის, ამას სულ სხვა მიზეზები აქვს, ნამდვილად ვერ მივაბამ ქოლცენტრების ამბავს, – ამის შესახებ „ნაციონალური მოძრაობის“ წევრმა, ბაჩო დოლიძემ განაცხადა.

მისი თქმით, ზღაპრებია, რომ დაკვეთილია სიუჟეტები.

„ჩრდილოვანი ბიზნესები ხელისუფლების ძალიან მაღალი ეშელონების ჩართულობის გარეშე ფიზიკურად ვერ ფუნქციონირებს. ვინმეს რომ უნდოდეს თავის ავტოფარეხში რაღაც კომპიუტერების, სერვერების დადგმა, 10 წუთში იქნება იდენტიფიცირებული. ძალიან ცუდია, რომ საქართველო რეპუტაციულად დაზიანებულია. დღეს პირველად არ ვისმენთ ქოლცენტრების არსებობის შესახებ საქართველოში, დიდი ხანია, ამაზე მუშაობა მიმდინარეობს. ძალიან ბევრი საგამოძიებო ჯგუფი ევროპის ქვეყნებიდან ჩამოსული იყო, ინტერესდებოდა, მაგრამ სამწუხაროდ, ის ბიზნესი, რომელიც ყველაზე მარტივად აღმოფხვრადია, ამდენი წელია ნარჩუნდება ქვეყანაში. ეს არის პრობლემა.

რაც შეეხება მოყვანილ სახელებსა და გვარებს, თუნდაც უდანაშაულობის პრეზუმფციიდან გამომდინარე ჩემი მხრიდან არასწორი იქნება დასახელება, მაგრამ  რეპუტაციულად დამაზიანებელია, ვინც არის ნახსენები. ის, რომ დაკვეთილია სიუჟეტები, ზღაპრებია. დავუშვათ, ვინმეს თუ ჰგონია, რომ კეზერაშვილის ჩართულობა ქოლცენტრების გამო არის პრობლემა ოპოზიციაში, არ ვიცი. როდესაც ვფიქრობდი, რომ არიან ადამიანები, რომელთა დისტანცირება უკეთესი იქნებოდა ზოგადად ოპოზიციისთვის, ამ ყველაფერს სულ სხვა მიზეზები აქვს, ნამდვილად ვერ მივაბამ ქოლცენტრების ამბავს. ამ საქმეს სჭირდება დამტკიცება, ყველა ადამიანს აქვს უფლება საკუთარი სიმართლე დაამატკიცოს“, – განაცხადა დოლიძემ.

„ბიბისიმ“ გამოაქვეყნა ფილმი ე.წ. ქოლცენტრების საქმეზე, რომლის თაღლითური სქემის ორგანიზატორად დავით კეზერაშვილი სახელდება და „მისტერ ოფშორად“ არის მოხსენიებული. მანამდე „ბიბისიმ“ გამოაქვეყნა ჟურნალისტური გამოძიების მასალები, სადაც გაშიფრულია ევროპელი პენსიონერების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული.