უკრაინის პრეზიდენტი ვოლოდიმირ ზელენსკი ოფიციალური ვიზიტით პარიზში ჩავიდა. ამის შესახებ ზელენსკი საკუთარ სოციალურ ქსელში წერს.

ზელენსკი პარიზში, ელისეის სასახლეში საფრანგეთის პრეზიდენტთან, ემანუელ მაკრონთან მართავს შეხვედრას.

„უკრაინა და საფრანგეთი ერთად იცავენ ევროპის თავისუფლებასა და უსაფრთხოებას! ჩვენ ყოველდღიურად ვუახლოვდებით მშვიდობას ყველა უკრაინელისთვის და ევროპელისთვის!“,- წერს უკრაინის პრეზიდენტი.

ელისეის სასახლეში მანამდე განაცხადეს, რომ შეხვედრის დროს ემანუელ მაკრონი დაადასტურებს საფრანგეთისა და ევროპის ურყევ მხარდაჭერას უკრაინის ლეგიტიმური უფლებების აღდგენისა და მისი ფუნდამენტური ინტერესების დასაცავად.

ზელენსკი პარიზში ჩასვლამდე, იტალიასა და გერმანიაში იმყოფებოდა, სადაც მაღალი რანგის შეხვედრები გამართა.