უკრაინის პრეზიდენტი ვოლოდიმირ ზელენსკი მონაწილეობას მიიღებს „დიდი ოცეულის“ (G20) სამიტში, რომელიც მომავალ კვირაში გაიმართება. ამის შესახებ უკრაინული მედია ზელენსკის წარმომადგენელზე, სერგი ნიკიფოროვზე დაყრდნობით იუწყება. მისივე ცნობით, უკრაინის ლიდერი, დიდი ალბათობით, ონლაინ რეჟიმში მიიღებს მონაწილეობას სამიტის მუშაობაში.

როგორც ცნობილია, რამდენიმე დღის წინ ვოლოდიმირ ზელენსკიმ განაცხადა, რომ ის არ მიიღებს სამიტის მუშაობაში მონაწილეობას, თუკი მას რუსეთის პრეზიდენტი ვლადიმირ პუტინი დაესწრება. უკრაინის პრეზიდენტის წარმომადგენელს, სერგი ნიკიფოროვს არ დაუზუსტებია, შეცვალა თუ არა ზელენსკიმ თავისი პოზიცია.

„დიდი ოცეულის“ სამიტი 15-16 ნოემბერს ინდონეზიაში გაიმართება.