თბილისსა და ბათუმში, „უცხოური გავლენის გამჭვირვალობის“ შესახებ კანონის წინააღმდეგ გამართული აქციების ორგანიზატორების განცხადებით, მათ საცხოვრებელ სახლებსა და პარტიულ ოფისებზე, გვიან ღამით მუქარის შემცველი წარწერები დატოვეს.

„ტიტე აროშიძე, შენს მეზობლად, იმ ოჯახში, სადაც ერთად არაერთხელ მივსულვართ, რომელიც შენთვისაც და ჩემთვისაც საკუთარი ოჯახივითაა (ჩემთვის ისევ ისეა, შენი ამბავი არ ვიცი), გზავნილი დატოვეს მუქარის! არავის არაფერს ვაბრალებ, გთხოვ მოძებნეთ ვინაა შემსრულებელი და დამკვეთი!

წარწერა გააკეთეს ჩემი მეგობრის, თანამშრომლის ძმის, ილია გუჩმანიძის საძინებლის კედელთან, არ ვიცი მისამართი აერიათ თუ შორი გზით მოდიან! კახა გუჩმანიძის ოჯახი, ორსული მეუღლე და ორი მცირეწლოვანი შვილიც აქ ცხოვრობს.

არა რუსულ მთავრობას, არა რუსულ რეჟიმს”, - წერს აქციის ერთ-ერთი ორგანიზატორი ციალა ქათამიძე.

თავის მხრივ, „ქართული ოცნების” წევრმა თენგიზ აფხაზავამ მომხდარში ოპოზიცია დაადანაშაულა.

მისი განცხადებით, ხელწერა „ნაციონალურ მოძრაობას” უკავშირდება.

„ეს ხელწერა არის „ნაციონალური მოძრაობის“. ყველამ იცის, თვითონ ურეკავენ თავისიანებს აგინებენ და აშინებენ და რეალურად გვაბრალებენ ჩვენ”, - აღნიშნა თენგიზ აფხაზავამ.

რაც შეეხება თბილისს, “ნაციონალური მოძრაობის” ოფისზე ანალოგიური წარწერები გაჩნდა:

შეგახსენებთ, რომ რამდენიმე დღის წინ ანალოგიური შეურაცხმყოფელი წარწერები ოპონენტებმა დატოვეს “ქართული ოცნების” დეპუტატის სახლზეც.