თბილისის საქალაქო სასამართლომ ტელეკომპანია „ფორმულას“ ტელეწამყვანი, ვახო სანაია ადმინისტრაციულ სამართალდამრღვევად ცნო.

მას 6-დღიანი ადმინისტრაციული პატიმრობა განესაზღვრა.

„რაღაცას მედავება ეს ხალხი მაშინ, როდესაც მათმა რეჟიმმა კონსტიტუცია დახია, ხალხი ცემა, პოლიტპატიმრები ჰყავს, ქვეყნის საგარეო კურსი შეცვალა. ყველა კანონი დარღვეულია, რომელიც ადამიანის უფლებებს ეხება. ჩემი ვალდებულებაა, იქ ვიყო, სადაც ხალხი, რომელიც ერთი წელია იბრძვის. ეს კი ვერ იქნება ხელოვნური. დარწმუნებული ვარ, ეს ბრძოლა დამთავრდება ჩვენი გამარჯვებით. ეს ადამიანები [შსს წარმომადგენლები], რომლებსაც ჰგონიათ, რომ რეჟიმიდან რეჟიმში გადავლენ, რეჟიმის დამხობის შემდეგ, ეს ხალხი აქ ვერ იქნება“,- განაცხადა ვახო სანაიამ პროცესზე.

მისი თქმით, რუსთაველის გამზირზე საავტომობილო გზა ყოველდღე უნდა გადაიკეტოს.

„რაც ვიდეო კადრებში არის, ეს ასეა, მაგრამ არანაირი ხელოვნური გადაკეტვა იქ [რუსთაველზე] არ ყოფილა, ამაზე ბუნებრივი არსად, არაფერი ხდება. სიტყვა ხელოვნური არის უადგილო, ყველა, ვინც იქ არის, გამოხატავს პროტესტს რეჟიმის წინააღმდეგ. ის რაც მათთვის ხელოვნურია, ეს ჩვენთვის ხელოვნური არ არის. უკანონო კანონებით არიან წარმოდგენილები. ეს არ არის ხელოვნური გადაკეტვა, ეს არის ბუნებრივი პროცესი, რომელიც რუსთაველზე ხდება“,- განაცხადა ვახო სანაიამ.

მისი თქმთ, პროტესტს გააგრძელებს.

„როგორც აქამდე გამოვხატავდი პროტესტს, გარეთ რომ გამოვალ, მერეც გამოვხატავ პროტესტს. მაინც ამოვთხრით“, - განაცხადა სანაიამ და მოსამართლეს მოუწოდა, დროულად მიიღოს გადაწყვეტილება.

ცნობისთვის, ვახო სანაიას შინაგან საქმეთა სამინისტრო, 18 ოქტომბრის საღამოს საათებში, რუსთაველის გამზირის ხელოვნურად გადაკეტვას ედავება.

შსს-ს ინფორმაციით, 18 ოქტომბრის საპროტესტო აქციის ფარგლებში ადმინისტრაციული წესით 14 პირი დააკავეს, ხოლო 13 პირის მიმართ საქმის წარმოება მიმდინარეობს. შსს-ს თანახმად, აქციის მონაწილეებმა დაარღვიეს „შეკრებებისა და მანიფესტაციების შესახებ“ საქართველოს კანონის მე-11 პრიმა მუხლის მოთხოვნები, რომლის თანახმადაც დაუშვებელია ტრანსპორტის სავალი ნაწილის ხელოვნურად გადაკეტვა, თუ ამას არ მოითხოვს შეკრების მონაწილეთა რაოდენობა. უწყებაში განმარტავენ, რომ "მიუხედავად პოლიციის მიერ გაკეთებული არაერთი მოწოდებისა, ასევე, შინაგან საქმეთა სამინისტროს მიერ ოფიციალურად გავრცელებული განცხადებისა, არ შეეფერხებინათ სატრანსპორტო მოძრაობა, აქციის მონაწილეები პოლიციას არ დაემორჩილნენ და გააგრძელეს კანონსაწინააღმდეგო ქმედება. ასევე, დემონსტრანტების ნაწილს ჰქონდა შენიღბული სახე, რაც, ასევე, კანონდარღვევას წარმოადგენს".