უნგრეთი რუსეთის მიმართ დაწესებული სანქციების გახანგრძლივების სანაცვლოდ, რვა ადამიანის სანქციების სიიდან ამოღებას ითხოვს. ამის შესახებ „რადიო თავისუფლების“ ევროპის ბიუროს რედაქტორი რიკარდ იოზვიაკი წერს.

„ევროკავშირთან მოლაპარაკებებში საუბარია რუსეთის მხრიდან უკრაინის წინააღმდეგ ომის საპასუხოდ დაწესებული სანქციების გაგრძელებაზე, რომელიც ეხება დაახლოებით 2 400 ფიზიკურ პირსა და კომპანიას. უნგრეთი, სანქციების გაგრძელებაზე თანხმობის სანაცვლოდ, რვა პირის სანქციების სიიდან ამოღებას ითხოვს. საბოლოო ვადაა 15 მარტი“, – წერს იოზვიაკი.

ევროკავშირის წევრი ქვეყნების ელჩების მორიგი შეხვედრა, რომელიც რუსეთის წინააღმდეგ სანქციების გახანგრძლივების საკითხს განიხილავს, ოთხშაბათს, 12 მარტს ბრიუსელში გაიმართება.