როგორც განცხადებაში ვკითხულობთ, რუსები გეგმავენ ელექტროსადგურზე ხელოვნური კატასტროფის შექმნას, შემდეგ კი ამის უკრაინელებისთვის დაბრალებას.
„ამჟამად ჩერნობილის ატომური ელექტროსადგური მთლიანად გათიშულია ატომური ენერგიის საერთაშორისო სააგენტოს (IAEA) მონიტორინგის სისტემებიდან. სადგური გათიშულია. ხელმისაწვდომი დიზელის გენერატორების რესურსი განკუთვნილია უსაფრთხოების სისტემების მუშაობისთვის 48 საათის განმავლობაში“, - ვკითხულობთ განცხადებაში.
განცხადებაში, ასევე, ვკითხულობთ, რომ უკრაინელ ხელოსნებს ელექტროსადგურზე სარემონტო სამუშაოების ჩასატარებლად უარი უთხრეს. სამაგიეროდ, შევიდნენ ბელარუსი სპეციალისტები.
„ოკუპანტებმა სადგურში შესასვლელად უკრაინელ ხელოსნებს უარი უთხრეს. სამაგიეროდ იქ ალექსანდრე ლუკაშენკოს დავალებით „ბელარუსი სპეციალისტები“ წავიდნენ. მათ შორის, ატომურ ელექტროსადგურებზე რუსი დივერსანტებიც შედიან ტერაქტის მოსაწყობად“, - წერია განცხადებაში.
უკრაინის თავდაცვის სამინისტროს მთავარი სადაზვერვო სამმართველო, ასევე, წერს, რომ რუსები ცდილობენ, შექმნან ყალბი მტკიცებულებები თავიანთი ვერსიის გასამყარებლად, თითქოს ჩერნობილის ავარიაში უკრაინელი სამხედროები მონაწილეობენ.
„ამავდროულად, ბოლო რამდენიმე დღის განმავლობაში, პუტინის ჯარები თავს დაესხნენ ზაპორიჟიას ატომურ ელექტროსადგურს და ხარკოვის ფიზიკა-ტექნოლოგიის ინსტიტუტს.
ჩერნობილის ავარიაში უკრაინელი სამხედროების მონაწილეობის იმიტაციის მიზნით, რუსები ცდილობენ, შექმნან ყალბი „მტკიცებულებები“ თავიანთი ვერსიის გასამყარებლად. კერძოდ, გოსტომელში ანტონოვის აეროპორტის მიმდებარედ გამოჩნდა რუსული საავტომობილო მაცივრები, რომლებიც აგროვებდნენ დაღუპული უკრაინელი დამცველების ცხედრებს. არსებობს შესაძლებლობა, რომ ისინი ჩერნობილის ზონაში მოკლულ დივერსანტებად წარმოაჩინონ
ამჟამად უკრაინასაც, მსოფლიოსაც და თავად რუსეთსაც ესმით, რომ განცხადებები ბირთვული საფრთხის შექმნაში უკრაინის ჩართულობის შესახებ მხოლოდ უღიმღამო სცენარის მიხედვით არის დადგმული.
ამის მიუხედავად, პუტინის მსგავს ქმედებებს დამღუპველი შედეგები მოჰყვება მთელი მსოფლიოსთვის“, - ვკითხულობთ უკრაინის თავდაცვის სამინისტროს მთავარი სადაზვერვო სამმართველოს მიერ გავრცელებულ განცხადებაში.
0
0
