უკრაინაში მიმდინარე საომარი მოქმედებების გამო ობლად დარჩენილი ოთხი ბოკვერი აშშ-ში, მინესოტას შტატის ცხოველთა თავშესაფარში გადაიყვანეს. ამის შესახებ „ეიბისი ნიუსი“ იტყობინება. 

მამრი ბოკვერი სახელად ტარასი და სამი მდედრი  - სტეფანია, ლესია და პრადა 5 თვის არიან. ობლად დარჩენილმა ბოკვერებმა ბოლო სამი კვირა პოლონეთში, პოზნანის ზოოპარკში გაატარეს.

ცხოველთა კეთილდღეობის საერთაშორისო ფონდის ინფორმაციით, ბოკვერებს რთული გზის გავლა მოუწიათ, სანამ შეერთებულ შტატებში ჩაიყვანდნენ.

„ამ პატარებმა თავიანთი მოკლე ცხოვრების მანძილზე ძალიან ბევრს გაუძლეს, ისინი დაიბადნენ ომის დროს და შემდეგ ობლად დარჩნენ“, - თქვა ფონდის ველური ბუნების გადარჩენის პროგრამის მენეჯერმა მერედიტ უიტნიმ.