უკრაინაში დაღუპული მებრძოლი ჯამბულათ (ჯაბა) ხოფერია გურიაში, ლანჩხუთის მუნიციპალიტეტის სოფელ გვიმბალაურში სამხედრო პატივით, საგვარეულო სასაფლაოზე დაკრძალეს.

ჯამბულათ (ჯაბა) ხოფერია უკრაინაში დაღუპული 27-ე ქართველი მებრძოლია. მისი ცხედარი სამშობლოში 8 დეკემბერს, გამთენიისას გადმოასვენეს.

25 წლის ახალგაზრდა მებრძოლი უკრაინაში ომის დაწყების პირველივე დღეებიდან იბრძოდა. გავრცელებული ინფორმაციით, ერთ-ერთი დაბომბვისას, ის ქიმიური ნივთიერებით მოიწამლა, გაიარა სათანადო მკურნალობის კურსიც, მაგრამ ეს უშედეგო აღმოჩნდა.

ქართველი მებრძოლი 1 დეკემბერს დაიღუპა.

24 თებერვლიდან დღემდე, რუსეთის ფართომასშტაბიან საომარ მოქმედებებს უკრაინაში 33 ქართველი მებრძოლი ემსხვერპლა.