უკრაინის უმაღლესმა რადამ ანდრეი სიბიგა ქვეყნის საგარეო საქმეთა მინისტრის თანამდებობაზე ხმათა უმრავლესობით დაამტკიცა. ინფორმაციას უკრაინელი დეპუტატი იაროსლავ ჟელეზნიაკი ტელეგრამის საკუთარ არხზე ავრცელებს.

სიბიგას დანიშვნას მხარი 258-მა დეპუტატმა დაუჭირა. დღესვე უკრაინის რადამ დმიტრო კულება საგარეო საქმეთა მინისტრის თანამდებობიდან გაათავისუფლა.

სიბიგა უკრაინის ტერნოპოლის ოლქის ქალაქ ზბოროვში 1975 წლის 1 იანვარს დაიბადა. მან ივან ფრანკოს სახელობის ლვოვის სახელმწიფო უნივერსიტეტი დაამთავრა სამართალმცოდნეობისა და საერთაშორისო ურთიერთობების სპეციალობით. სიბიგამ დიპლომატიურ სამსახურში მუშაობა 1997 წელს დაიწყო. 2024 წლიდან ის საგარეო საქმეთა მინისტრის პირველი მოადგილე იყო.