„დღეს საგარეო საქმეთა მინისტრების ნამდვილად ძალიან დროული შეხვედრაა, რამდენადაც რუმინეთი შეშფოთებულია, ჩვენთვის ყველაზე მნიშვნელოვანი საკითხი არის რეაგირება, რომელიც ნატო-მ უნდა იქონიოს რუსეთის აგრესიაზე, თანმიმდევრული კონსოლიდაცია აღმოსავლეთ ფლანგზე შეკავებისა და თავდაცვის პოზიციის თვალსაზრისით. ჩვენთვის ძალიან მნიშვნელოვანია, დავაჩქაროთ საბრძოლო ჯგუფების შექმნა რუმინეთში, რომელსაც საფრანგეთი უხელმძღვანელებს“, – განაცხადა აურესკუმ.
ბოგდან აურესკუ აღნიშნავს, რომ ნატო-მ უნდა გადახედოს თავის ფილოსოფიასა და ინფრასტრუქტურას, რადგან მდგომარეობა ახლა სრულიად განსხვავებულია.
„უნდა მოვარგოთ ეს პოზიცია არსებულ რეალობას, რომელიც გვიჩვენებს, რომ რუსული შეიარაღებული ძალები უკრაინასა და ბელარუსში იმყოფებიან“, – აცხადებს აურესკუ.
რუმინეთის საგარეო საქმეთა მინისტრის თქმით, ქვეყნის პრეზიდენტის მიერ მიღებული გადაწყვეტილებით, მომდევნო ფისკალური წლიდან, ნატო-ს ბიუჯეტში რუმინეთი მშპ-ის 2.5 პროცენტამდე გაზრდის შენატანს, ნაცვლად არსებული 2 პროცენტისა.
ბრიუსელში ნატო-ს საგანგებო შეხვედრისთვის ალიანსის საგარეო საქმეთა მინისტრები იკრიბებიან. შეხვედრას ნატო-ს პარტნიორი ქვეყნების რანგში ესწრებიან ფინეთისა და შვედეთის წარმომადგენლები. ასევე, შეხვედრაზე მიწვეულია საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი ჯოზეფ ბორელიც. დღევანდელ მინისტერიალზე განსახილველი მთავარი საკითხი უკრაინაში არსებული ვითარებაა.
0
0
