თუშეთში ახალგაზრდა მწყემსი გარდაიცვალა. 40 წლამდე ასაკის კაცი სოფელ ხისოდან მაშველებისა და ადგილობრივების დახმარებით გადმოასვენეს. გარდაცვლილი ახმეტის მუნიციპალიტეტის სოფელ ფიჩხოვანის მკვიდრია.

ადგილობრივების ინფორმაციით, მწყემსი ცხვრის გადარეკვის დროს შეუძლოდ გახდა. თავდაპირველად დახმარება ადგილზე მყოფმა პირებმა აღმოუჩინეს. თუმცა, მისი გადარჩენა ვერ მოახერხეს.

უამინდობის გამო, ცხედრის გადმოსასვენებლად ავიარეისი ვერ შესრულდა, ამიტომ გადმოსვენების პროცესში მაშველები ჩაერთნენ.

ცხედარი თავდაპირველად გურჯაანში, ექსპერტიზის ეროვნულ ბიუროში, მოგვიანებით კი საცხოვრებელ სახლში გადაასვენეს.

თუშეთთან დამაკავშირებელი საავტომობილო გზა ყოველი წლის ოქტომბრის თვეში იკეტება და მაისის ბოლოს იხსნება. გზის გაწმენდით სამუშაოებს მძიმე ტექნიკა ასრულებს.