ბოლო მონაცემებით, ორშაბათს, დილით, თურქეთში მომხდარი ძლიერი მიწისძვრის შედეგად 912 ადამიანი დაიღუპა და 5385 დაშავდა.

ეს მაჩვენებელი, ადგილობრივი დროით 13:00 საათისთვის, პრეზიდენტმა რეჯეფ თაიფ ერდოღანმა გამოაცხადა, იუწყება თურქეთის სახელმწიფო სააგენტო Anadolu.

ერდოღანის თქმით, მიწისძვრა, რომელიც ორშაბათს, ადგილობრივი დროით 04:17 წუთზე მოხდა, ყველაზე დიდი კატასტროფა იყო თურქეთის ისტორიაში 1939 წლის კატასტროფული ერზინჯანის მიწისძვრის შემდეგ, რომელსაც 33 000-ზე მეტი ადამიანი შეეწირა.

ერდოღანმა განმარტა, რომ მიწისძვრა 7,7 მაგნიტუდის იყო და ახლა მთავრობა მნიშვნელოვან ნაბიჯებს დგამს შედეგების აღმოსაფხვრელად. მისივე თქმით, მიწისძვრის ზონაში შენობების ნანგრევებზე სამძებრო-სამაშველო სამუშაოები უწყვეტად გრძელდება.

ერდოღანმა განაცხადა, რომ ანკარას დახმარების შეთავაზება უკვე მიღებული აქვს მსოფლიოს 45 ქვეყნიდან, მათ შორის, ევროკავშირიდან და ნატოდან.