თურქეთის მთავრობამ დაგმო ოპოზიციის მოწოდებები მასობრივი კომერციული ბოიკოტის შესახებ და მათ ეკონომიკური "დივერსიის მცდელობა" უწოდა. აღნიშნული მოწოდებები სტამბულის მერის ეკრემ იმამოღლუს დაპატიმრების შემდეგ გაჟღერდა, რამაც ქვეყნის მასშტაბით პროტესტი გამოიწვია. როგორც ცნობილია, იმამოღლუ ერდოღანის მთავარი პოლიტიკური კონკურენტი და მომავალ არჩევნებში რესპუბლიკური სახალხო პარტიის საპრეზიდენტო კანდიდატია.
მთავარმა ოპოზიციურმა რესპუბლიკურმა სახალხო პარტიამ მოსახლეობას მოუწოდა, რომ მოერიდონ პროდუქტების შეძენას ან სერვისების გამოყენებას იმ კომპანიებისგან, რომლებსაც, სავარაუდოდ, კავშირები აქვთ ან მხარს უჭერენ პრეზიდენტ თაიფ ერდოღანის მთავრობას. ეს მოწოდება ასევე მოიცავდა ყველა ტიპის ვაჭრობის შეჩერებას ერთი დღით, რის გამოც ზოგიერთი მაღაზია სოლიდარობის ნიშნად დაიხურა.
როგორც ვაჭრობის მინისტრმა ომერ ბოლატმა განაცხადა, ბოიკოტისკენ მოწოდებები საფრთხეს უქმნის ეკონომიკურ სტაბილურობას.
,,ისინი ეკონომიკის საბოტაჟს ცდილობენ, რაც მოიცავს უსამართლო ვაჭრობასა და კონკურენციის ელემენტებს. ჩვენ ამას აღვიქვამთ იმ წრეების უშედეგო მცდელობად, რომლებიც თავს ამ ქვეყნის ბატონებად თვლიან. მოვუწოდებ ჩვენს მოქალაქეებს, რომ თუ რაიმე სავაჭრო გეგმები გაქვთ დღეს, ხვალ, ზეგ ან უახლოეს დღეებში, შეიძინეთ ყველაფერი დღესაც", - თქვა ბოლატმა სახელმწიფო მაუწყებელ TRT-თან ინტერვიუში.
რამდენიმე მინისტრმა და ხელისუფლების მომხრე ცნობილმა პირმა, მათ შორის, გერმანიისა და მადრიდის ,,რეალის’’ ყოფილმა ნახევარმცველმა მესუთ ოზილმა, თავიანთი პოზიციის ხაზგასასმელად ჰეშთეგი #BoykotDegilMilliZarar ("არა - ბოიკოტს, რომელიც აზიანებს ეროვნულ კეთილდღეობას") გამოიყენა.
0
0
