ტრამპის ადმინისტრაციამ ხელოვნური ინტელექტის განვითარების ფართომასშტაბიანი გეგმა წარმოადგინა და პირობა დადო, რომ ხელს შეუწყობს აშშ-ის ინოვაციებს, ამავდროულად აღმოფხვრის ე.წ. „ბიუროკრატიზმს“ და „იდეოლოგიურ მიკერძოებას“.

28-გვერდიანი ხელოვნური ინტელექტის სამოქმედო გეგმა სწრაფად განვითარებადი ტექნოლოგიისთვის 90-ზე მეტ პოლიტიკურ ქმედებას ასახავს, რომელთა განხორციელებაც, ადმინისტრაციის წარმომადგენლების თქმით, მომდევნო წლის განმავლობაში იქნება შესაძლებელი.

„ჩვენ ხელოვნური ინტელექტის სფეროში ლიდერობისთვის რბოლაში ვართ ჩართულნი და გვსურს, რომ შეერთებული შტატები გამარჯვებული დარჩეს. ხელოვნური ინტელექტის  ამერიკული სისტემების განვითარება თავისუფალი უნდა იყოს იდეოლოგიური მიკერძოებისგან ან ინჟინერიული სოციალური დღის წესრიგისგან. სწორი სამთავრობო პოლიტიკით, შეერთებულ შტატებს შეუძლია განამტკიცოს თავისი პოზიცია, როგორც ხელოვნური ინტელექტის ლიდერმა, და ყველა ამერიკელისთვის უფრო ნათელი მომავალი უზრუნველყოს.

გეგმა ნაწილობრივ ორიენტირებულია ხელოვნური ინტელექტის ტექნოლოგიის ბოროტად გამოყენების ან მოპარვის თავიდან აცილებაზე და ხელოვნური ინტელექტით გამოწვეული ახალი და გაუთვალისწინებელი რისკების მონიტორინგზე. ხელოვნური ინტელექტი რევოლუციური ტექნოლოგიაა, რომელსაც ღრმა შედეგები მოჰყვება როგორც ეკონომიკისთვის, ასევე ეროვნული უსაფრთხოებისთვის. ძალიან მნიშვნელოვანია, რომ ამერიკა კვლავაც იყოს დომინანტი ძალა ხელოვნურ ინტელექტში“, - განაცხადა თეთრმა სახლმა. 

თუმცა კრიტიკოსებმა ხელოვნური ინტელექტის გეგმა გააკრიტიკეს, რადგან ეს თეთრი სახლის იდეოლოგიურ ნაბიჯად მიიჩნიეს. 

„თეთრი სახლის ხელოვნური ინტელექტის სამოქმედო გეგმა ტექნოლოგიური მილიარდერების მიერ დაიწერა და არ ემსახურება ფართო საზოგადოების ინტერესებს. [ადმინისტრაციის] პოზიცია კორპორატიულ ინტერესებს რიგითი ადამიანების საჭიროებებზე მაღლა აყენებს, რომლებიც ისედაც განიცდიან ხელოვნური ინტელექტის გავლენას“, - თქვა AI Now Institute-ის თანააღმასრულებელმა დირექტორმა სარა მაიერს ვესტმა.