“საქართველოს ხელისუფლება ტერორს ახორციელებს მხედრიონის და კომკავშირის გაუგებარი ნაზავით” - ამის შესახებ “მთავარი არხის” დამფუძნებელი, ნიკა გვარამია წერილში წერს, რომელსაც საკნიდან ავრცელებს. გვარამია დღეს განვითარებულ პროცესებსა და თორნიკე რიჟვაძის განცხადებას ეხმაურება:

"საქართველოს ქუჩებში გახურებული პოლიტიკური ტერორია, 
საქართველოს ხელისუფლება კი - ამ ტერორიზმის სპონსორი, რომელიც ტერორს ახორციელებს მხედრიონის და კომკავშირის გაუგებარი ნაზავით.  
ქართული პოლიცია, რომელმაც უკვე ყველაფერი იკადრა, რისი კადრებაც არ შეიძლება, თავისი უმოქმედობით ღიად ეხმარება დამნაშავეებს და უარს აცხადებს მოქალაქეების დაცვაზე. 
როცა კადრებში ხედავ, რომ პატრული დამნაშავეს დაკავებისას იარაღსაც კი არ ართმევს (რაც პირველ რიგში უნდა გააკეთოს), პატრულის მანქანაშიც კი იარაღით სვამს, ცხადია, რომ სამართალდამცავი სისტემა თავადაა დანაშაულებრივი სინდიკატის ნაწილი  და ის ჩვენ არ დაგვიცავს. მეტიც, თუ მათ პატრონს დასჭირდა, თავადაც დაგვესხმება თავს, რაც, პრინციპში, არაერთხელ უქნია. 
უნდა მოვიფიქროთ, თუ როგორ დავიცვათ საკუთარი თავი, ჩვენი შვილები, მშობლები. არ შეიძლება ასე დაუცველები ვხვდებოდეთ ყოველდღიურ გამოწვევებს ქუჩებში, ქალაქებსა  თუ სოფლებში. მსხვერპლის როლი არ უნდა მოვირგოთ, წინააღმდეგობა უნდა გავწიოთ.  ამისი გზები აუცილებლად  მოსაფიქრებელია და ალბათ ეს არის ის, რაზეც ყველამ ერთად, განსაკუთრებით კი პოლიტიკურმა პარტიებმა უნდა იფიქრონ და სწრაფად იპოვონ გამოსავალი.
რაც შეეხება თორნიკე რიჟვაძეს, რომელიც ქართული ოცნების კვალობაზეც კი გამორჩეული რეგვენი და ნაძირალაა, მან თქვა ზუსტად ის, რასაც ფიქრობს თითოეული ქოცი. უბრალოდ, ზოგი ამას ამბობს, ზოგი - არა.  
მთავარი არის ის, რომ ქოცები ასრულებენ რუსულ ამოცანას - საქართველო ქვეყნიდან აქციონ ტერიტორიად. და უნდა აღინიშნოს, რომ  ისინი ამას, ჯერჯერობით, წარმატებით ახერხებენ." წერს ნიკა გვარამია.