ტოკიოში მიმდინარე წლის მესამე ბაშოზე წარუმატებელ გამოსვლას აგრძელებს ლევან გორგაძე (ტოჩინოშინი). ქართველმა სუმოისტმა, რომელიც რანგით მეორე დივიზიონში, ჯურიოში გამოდის, ტურნირის მესამე დღეს ჰაკუიოძანთან წააგო.

ბრძოლის დაწყებისთანავე უპირატესობა იაპონელმა მეტოქემ მოიპოვა, მას ტოჩინოშინმა ვერაფერი დაუპირისპირა და ბრძოლა ოშიდაშის ილეთით დათმო.

წინა ბაშოზე მიღებული მხრის ტრავმა ლევან გორგაძეს სასურველ დონეზე ასპარეზობის საშუალებას არ აძლევს, მას ტკივილის ფონზე უწევს დოჰიოზე გასვლა.

ამჟამად ტოჩინოშინი ჯურიოს დივიზიონში მეხუთე ნომრადაა განთესილი. სამი დღის შემდეგ მაისის ბაშოზე მისი ბალანსი უარყოფითია – 0:3.