ვლადიმერ პუტინმა პირადად დაადასტურა, რომ საქართველოს ხელისუფლება ქართველი ხალხის ზურგს უკან, მოღალატეობრივად, მალულად აწარმოებდა მოლაპარაკებებს რუსეთის ფედერაციასთან, - ამის შესახებ ფრაქცია „ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშია“ თავმჯდომარემ, თინათინ ბოკუჩავამ განაცხადა.

ფრაქციის თავმჯდომარემ პრემიერ-მინისტრის პარლამენტში მისვლა და რუსეთთან ფრენების აღდგენის და სავიზო რეჟიმის გაუქმების გადაწყვეტილებასთან დაკავშირებით პასუხის გაცემა მოითხოვა.

„რა დათმო საქართველოს ხელისუფლებამ სანაცვლოდ, სხვა რა საკითხები განიხილებოდა ფარულ მოლაპარაკებებზე ოკუპანტთან. დაუყოვნებლივ გამოცხადდეს პარლამენტში ირაკლი ღარიბაშვილი და განუმარტოს საზოგადოებას“, - აღნიშნა თინათინ ბოკუჩავამ.