ჩემთვის დიდი პატივია თქვენს წინაშე წარმოვადგენდე ჩემს ქვეყანას, ქართველ ხალხს, რომელიც მამაცურად იბრძვის ევროპული დროშისა და იმ ღირებულებებისთვის, რომელსაც დაეფუძნა ევროპული პროექტი - მშვიდობის და კეთილდღეობის პროექტი - ერთმა კოლეგამ მკითხა, თუ რატომ არ არის „ქართული ოცნების“ დელეგაცია. იმიტომ, რომ მათ არ სურთ სიმართლის მოსმენა, - ამის შესახებ „ერთიანი ნაციონალური მოძრაობის“ თავმჯდომარემ, თინა ბოკუჩავამ ევრონესტზე სიტყვით გამოსვლისას განაცხადა.

მისივე თქმით, მაშინ, როდესაც სომხეთმა და აზერბაიჯანმა ისტორიული ნაბიჯი გადადგეს და უპრეცედენტო შესაძლებლობები გახსნეს სამხრეთ კავკასიაში მდგრადი მშვიდობისა და მათი ხალხისთვის კეთილდღეობის მისაღწევად, საქართველო ხდება ავტოკრატიული ჩიხი და ევროპის მეტოქეებისთვის ეკონომიკური და პოლიტიკური გავლენის სტრატეგიული დასაყრდენი.

„ძვირფასო კოლეგებო,

ჩემთვის დიდი პატივია თქვენს წინაშე წარმოვადგენდე ჩემს ქვეყანას, ქართველ ხალხს, რომელიც მამაცურად იბრძვის ევროპული დროშისა და იმ ღირებულებებისთვის, რომელსაც დაეფუძნა ევროპული პროექტი - მშვიდობის და კეთილდღეობის პროექტი.

ერთმა კოლეგამ მკითხა, თუ რატომ არ არის „ქართული ოცნების“ დელეგაცია. იმიტომ, რომ მათ არ სურთ სიმართლის მოსმენა. სიმართლე კი არის შემდეგი:

მაშინ, როდესაც მოლდოვამ მათი საპარლამენტო არჩევნებით აჩვენა, რომ ევროპას შეუძლია რუსეთზე გამარჯვება, ხოლო უკრაინა ყოველდღე აჩვენებს, რომ ნამდვილად ღირს ევროპისთვის ბრძოლა, საქართველო - ერთ დროს ასოცირებული ტრიოს მოწინავე ქვეყანა - იქცა ერთპარტიულ დიქტატურად, რომელიც წყდება ევროპული ინტეგრაციის გზიდან და პუტინის მკლავებში ექცევა.

მაშინ, როდესაც სომხეთმა და აზერბაიჯანმა ისტორიული ნაბიჯი გადადგეს და უპრეცედენტო შესაძლებლობები გახსნეს სამხრეთ კავკასიაში მდგრადი მშვიდობისა და მათი ხალხისთვის კეთილდღეობის მისაღწევად, საქართველო ხდება ავტოკრატიული ჩიხი და ევროპის მეტოქეებისთვის ეკონომიკური და პოლიტიკური გავლენის სტრატეგიული დასაყრდენი.

როდესაც ევროპა რეგიონებს შორის კავშირების განმტკიცებაზე ფიქრობს, ჩვენ უნდა ვაღიაროთ ის ფაქტი, რომ ეკონომიკური ინტეგრაცია შეუძლებელია, როდესაც საზოგადოებრივი სტრუქტურა სისტემატურად და ძალადობრივად იშლება რეჟიმის მიერ, რომელიც აღარ წარმოადგენს მისი ხალხის მისწრაფებებს, როდესაც ოჯახები ერთმანეთს შორდებიან და ტერორში არიან ჩათრეულნი მასობრივი დაპატიმრებებისა და დაშინების გზით.

დღეს საქართველოში, რომელიც ოდესღაც ცნობილი იყო რეფორმებითა და დემოკრატიული ტრანსფორმაციით, ერთ სულ მოსახლეზე მეტი პოლიტიკური პატიმარია, ვიდრე თავად პუტინის რუსეთში.

პოლიტიკური ლიდერების უმეტესობა ციხეშია;

ყველაზე დიდი ოპოზიციური პარტიები იკრძალებიან ყალბი კონსტიტუციური პროცესის იმიტაციით;

მშვიდობიან მომიტინგეებს ციხეში ყრიან მხოლოდ ევროპის დროშის ტარების გამო;

დრაკონულმა კანონებმა და მასობრივმა ტერორმა სამოქალაქო საზოგადოების საქმიანობა ფაქტობრივად უკანონო გახადა;

ჟურნალისტები სამიზნედ იქცნენ;

ახლა კი რეპრესიების ახალ ტალღაში რეჟიმმა მიზანში ამოიღო უმაღლესი საგანმანათლებლო დაწესებულებები აკადემიური წრეების გასაკონტროლებლად, კრიტიკული ხმების ჩასახშობად და განსხვავებული აზრის გასაჩუმებლად.

მაგრამ თავისუფლებისმოყვარე ქართველები არ გაჩუმდებიან! ჩვენ არ დავნებდებით! და ვიბრძოლებთ სანამ გვიან არ არის!

ეს მზია ამაღლობელის სიტყვებია - ქართველი ხალხის ევროპული ინტეგრაციისთვის ბრძოლის ნამდვილი სიმბოლო, რეჟიმის მიერ დაპატიმრებული დამოუკიდებელი ქალი ჟურნალისტი.

ევროპარლამენტის გადაწყვეტილება, მისთვის, ანჯეი პოჩობუტთან ერთად, 2025 წლის სახაროვის პრემიის მინიჭების შესახებ, მისი და ქართველი ხალხის ტირანიისა და უსამართლობის წინააღმდეგ ბრძოლის ყველაზე დიდი აღიარებაა.

მსურს, მადლობა გადაგიხადოთ ყველა თავისუფლებისმოყვარე ქართველის სახელით ამ წარმოუდგენელი დაფასებისთვის.

ევროკავშირის წევრი სახელმწიფოებისგან ასევე საჭიროა მოქმედება:

საერთაშორისო ფინანსურმა ინსტიტუტებმა შეაჩერონ ევროკავშირის გადასახადის გადამხდელების ფულის ჩაყრა საქართველოს ავტოკრატი მმართველისა და მისი ხელშემწყობების კორუმპირებულ ჯიბეებში;

შეაჩერონ უვიზო მიმოსვლა ივანიშვილისა და მასთან დაახლოებული პირებისთვის;

სანქციები მიმართონ რეჟიმზე და არა მოქალაქეებზე, და ეს გააკეთონ დაუყოვნებლივ.

ევროპის უმოქმედობა საქართველოსთან დაკავშირებით ნიშნავს მის გამხნევებას უკრაინაში, მოლდოვაში და აქ, სომხეთში, სადაც ჩვენმა ძვირფასმა მასპინძლებმა ისტორიული ნაბიჯები გადადგეს დემოკრატიზაციის გზაზე.

მოქმედება არა მხოლოდ მორალური, არამედ პრაგმატული იმპერატივია ჩვენი და ჩვენი მოქალაქეების უსაფრთხოებისა და კეთილდღეობისთვის.

დიდი მადლობა ამ შესაძლებლობისთვის.

ერთად ჩვენ უფრო ძლიერები ვართ და დღევანდელი მნიშვნელოვანი სესია ამის დასტურია“, - აღნიშნა ბოკუჩავამ.