თეთრი სახლის პრესმდივანმა, კაროკლინ ლევიტმა განაცხადა, რომ აშშ-ის პრეზიდენტს, დონალდ ტრამპს სურს უკრაინაში ცეცხლის მუდმივი და არა დროებითი შეწყვეტა. ინფორმაციას ამის შესახებ სააგენტო Reuters-ი ავრცელებს.

ლევიტმა ჟურნალისტებს განუცხადა, რომ ტრამპი სულ უფრო მეტად იმედგაცრუებულია ვლადიმირ პუტინით და ვოლოდიმირ ზელენსკით და ორივე ლიდერს მოუწოდებს, მოლაპარაკების მაგიდასთან დაჯდნენ.

მანამდე პუტინმა ფაშიზმზე გამარჯვების მე-80 წლისთავთან დაკავშირებით უკრაინაში ცეცხლის დროებითი შეწყვეტის შესახებ გამოაცხადა.

პუტინის გადაწყვეტილებით, ცეცხლის შეწყვეტის რეჟიმი 8 მაისს 00:00 საათზე ამოქმედდება და 11 მაისის 00:00 საათამდე გაგრძელდება. ამ პერიოდში ყველანაირი სამხედრო მოქმედება შეჩერებული იქნება.