თბილისში დღეს დანიის საელჩო გაიხსნება. დიპლომატიურ ოფისს (წარმომადგენლობას) საქართველოში ოფიციალური ვიზიტით მყოფი დანიის სამეფოს საგარეო საქმეთა მინისტრი მის ქართველ კოლეგასთან ერთად ოფიციალურად გახსნის.

ლარს ლოკე რასმუსენი უკვე საქართველოშია. პირველ შეხვედრას დღეს დილით ის ილია დარჩიაშვილთან გამართავს. აუდიენცია შედგება როგორც პირისპირ, ასევე გაფართოებულ ფორმატში. შეხვედრა გაიმართება პრემიერ-მინისტრთანაც. აღსანიშნავია, რომ ლარს ლოკე რასმუსენს თან ახლავს დანიელ ბიზნესმენთა დელეგაცია, დაგეგმილია მათი შეხვედრა ეკონომიკის მინისტრ ლევან დავითაშვილთან. ვიზიტის ფარგლებში დანიის პირველი დიპლომატი საოკუპაციო ხაზსაც ეწვევა და არსებულ ვითარებას ადგილზე გაეცნობა.