იმედგაცრუებული ვარ ხოლმე მაშინ, როდესაც ვიღაცისგან რაღაცას ველოდები და ქალბატონი სალომესგან არ ველოდებოდი დიდად არაფერს, – ამის შესახებ პარტია „კანონი და სამართალის“ ლიდერმა, თაკო ჩარკვიანმა საქართველოს პირველი არხის გადაცემაში „დღის თემა“ განაცხადა.

„უბრალოდ, არ ვუშლიდი ხელს ერთობას, არასოდეს. სიტყვა ერთობა რომ სადღაც გაჟღერდება, მე მზად ვარ, აბსოლუტურად რიგითი ვიყო და ვფიქრობ, ამას ვამტკიცებ საქციელით. თუ ეს სჭირდება ქვეყანას, იმწამსვე შემიძლია, სრულიად რიგითი მებრძოლი ვიყო და არავითარი პრეტენზიები არ მაქვს, რომ სამომავლოდ მე ეს მინდა, გავაკეთო. მოუგებელ ბრძოლაში ზოგმა პრემიერად წარმოიდგინა თავი. არ ვჭორაობ, მათ განცხადებებს ვეყრდნობი. მაგალითად, ხაზარაძე გამოვიდა, მახსოვს და თქვა, ამირჩიეთ პრემიერად და აგაყვავებთო. ხომ იყო ასეთი განცხადებები, ხომ?! მე ეს არ მესმის, ვერ ვიგებ. მე ვიგებ ბრძოლას, მესმის. ოპოზიციამ უნდა იბრძოლოს. სალომე ზურაბიშვილის მიმართ ჩემი დამოკიდებულება არ ნიშნავს უპატივცემულობას, სრულიად არ ნიშნავს. მას რაღაც თავისი მოსაზრებები აქვს და ნიშა აქვს შეიძლება, არ ვიცი. არ მინდა, მხოლოდ ქალბატონ სალომეზე ვისაუბრო, მაგრამ ობიექტურად, ბევრი არასწორი სტრატეგიით მოქმედებდა, ჩემი აზრით“, – განაცხადა ჩარკვიანმა.

გადაცემის წამყვანის შეკითხვაზე, რა იყო არასწორი სტრატეგია სალომე ზურაბიშვილის მხრიდან, თაკო ჩარკვიანმა განაცხადა, რომ სალომე ზურაბიშვილმა განცხადებებით მოლოდინის რეჟიმში დასვა ხალხი.

„ბევრჯერ ვთქვი სიტყვა. ძალიან ეშინიათ ამ სიტყვის და მიკვირს. ამას ელემენტარული ლექსიკონური განათლება სჭირდება, სხვა არაფერი – როდესაც ვსაუბრობთ აჯანყებაზე, სახალხო აჯანყება აბსოლუტურად არ გულისხმობს შეიარაღებას. 2003 წელს არანაირი შეიარაღება არ ყოფილა, ისე მოხდა. მე რა მაინტერესებს, იცით? როდესაც ოპოზიცია არ შედის პარლამენტში და ამას ვემხრობი. თქვენ იცით ჩემი პოზიცია, ყველაზე ბოლო ვიყავი „ნაციონალური მოძრაობის“ დროს და მაშინაც ვთვლიდი ბოლომდე, რომ ბოიკოტი ყოფილიყო. თუ ამას აცხადებ, უნდა იყო ბოიკოტში, მაგრამ ნუ კარგი, როგორც მოხდა. ჩვენ ვიბრძოლეთ ქალებმა, რაღაც კეთილსინდისიერად, მამაკაცებმაც, მაგრამ განსაკუთრებით ქალების როლი იყო იმ რუსულ კანონთან დაკავშირებით მეათე მოწვევის პარლამენტში და ყველაფერი გავაკეთეთ, რომ ის კანონი მაშინ არ გასულიყო. პირველ მოსმენას ვგულისხმობ. ამით ვამაყობ, რადგან მგონია, ეს კეთილსინდისიერი ბრძოლა იყო და მგონი, ოპონენტმაც ყოველთვის უნდა დაინახოს. ოპონენტის კეთილსინდისიერება ყოველთვის უნდა დაინახო. აი, „ფეიკის“ უნდა ეშინოდეს ყოველთვის ყველას. იმიტომ, რომ „ფეიკი“ ბრძოლაში ყველასთვის „ფეიკად“ რჩება. მე კი არ ველოდებოდი ქალბატონი სალომეს პლატფორმიდან უფრო რადიკალურ ნაბიჯებს, მისი განცხადებები იყო ასეთი. მოლოდინის რეჟიმში დასვა ხალხი, პრაქტიკულად. ხომ მართალი ვარ? მგონი, არ ვაჭარბებ და 31-ში, როდესაც პაატას მიკროფონი პრაქტიკულად გამოურთეს და ძალიან უხერხული ვითარება შეიქმნა, ასეთი რამ არც მინახავს, პაატას ძალიან სწორი რეაქცია ჰქონდა. იქ მყოფი ძალიან გულწრფელი ადამიანების, მაგალითად, არაჩვეულებრივი პიროვნება არის ექიმი, ჩახუნაშვილი, შეიძლება იცით, ნამდვილი მებრძოლია და ასეთი ადამიანების განაწყენება, გულის ტკენა ღალატის ტოლფასია. როდესაც შენ ამბობ ამ დროს, აბა, რა ვქნათ, დანარჩენი ყველაფერი რადიკალიზმია. აბა ოპოზიციონერი რადიკალი თუ არ არის, რისი ოპოზიციონერია?“, – განაცხადა ჩარკვიანმა.

თამთა სანიკიძის შეკითხვაზე, რამდენად არის კოორდინირებული ერთმანეთთან ორი პლატფორმა, სალომე ზურაბიშვილის გარშემო და პაატა ბურჭულაძის გარშემო, ხომ არ შეუშლის ხელს ერთმანეთს და ხომ არ დააზიანებს პროტესტს ორი ალტერნატიული პლატფორმა, თაკო ჩარკვიანმა განაცხადა, რომ საერთოდ რომ არ მოსწონდეს ვიღაცის სტრატეგია, ის ჩამშლელი არაფრით არ აღმოჩნდება და კოორდინაციას შორის ხელს არავის არასოდეს შეუშლის.

„მე დამშლელი ვერ ვიქნები. დაშლა-მოშლა, ეს ყველაფერი ჩერგოლეიშვილისკენ. ერთადერთი, რაც არ მომწონს, მელია თუ აპიპინებდა და დაატარებდა ხალხს, ესენი ასეირნებენ და შედეგიც აი, ეს არის“, – განაცხადა ჩარკვიანმა.

შეკითხვაზე, საჭირო იყო თუ არა ოპოზიციური ერთობის უზრუნველყოფა, რომელიც ვერ შედგა, ჩარკვიანმა აღნიშნა, რომ ისმის კითხვა, ვერ შეძლეს, თუ არ შეძლეს.

„როგორც კი გამოჩნდა ის ქალბატონი თავისი უხამსი ლექსიკით, ვგულისხმობ ჩერგოლეიშვილს, განა ჩერგოლეიშვილს რამე შეუძლია, ამ შემთხვევაში მე მეტად ვადანაშაულებ ქალბატონ სალომეს. იმიტომ, რომ გაკოტრებული პარტიაა, რომელიც ხალხმა გაანულა, ამ ცოლ-ქმარს ნული დაუწერა და შენ რატომ ახდენ მის რეაბილიტაციას? აი, ეს კითხვა მინდია ნამდვილი ოპოზიციონერებისთვის, ვინც რუსთაველზე დგას“, – განაცხადა ჩარკვიანმა.

გადაცემის წამყვანმა სტუმარს უთანხმოების სხვა მიზეზებიც შეახსენა, მაგალითად, გიორგი გახარიას განცხადება თვითმმართველობის არჩევნებთან დაკავშირებით, რაზეც თაკო ჩარკვიანმა განაცხადა, რომ გახარია შეთანხმებას სულ დაარღვევს.

თაკო ჩარკვიანმა ასევე თქვა, რომ 99% აქვს ინფორმაცია, რომ „ლელოში“ ლაპარაკია დაწყებული თვითმმართველობის არჩევნებზე.

„შემიძლია ვთქვა, რომ 99% მაქვს ეს ინფორმაცია, მაგრამ მაინც 1%-ს ვუტოვებ, რაღაც შანსს. იმიტომ, რომ იქ ვიღაცები არიან თვითონ პარტიაში, ძალიან ბევრი ნორმალური ხალხია, მაგრამ ზოგადად, მევახშის გათავისუფლებული საქართველო არ მგონია, რა ვქნა“, – განაცხადა ჩარკვიანმა.

თამთა სანიკიძემ სტუმარს პოლიტიკოსების მიერ გირაოს გადახდასთან დაკავშირებითაც ჰკითხა, რაც ასევე გახდა გარკვეული უთანხმოების საკითხი, რაზეც ჩარკვიანმა აღნიშნა, რომ თუ ქუჩაში იქნებოდა ნამდვილი ბრძოლა და გრგვინვა, ანუ 100 000 ადამიანი, მაშინ გირაო არ უნდა გადაიხადონ, ხოლო თუ ქუჩაში საერთოდ არაფერი არ ხდება, რასაც ახლა შვებიან, გაუგებარია, ტყუილად რატომ ჯდებიან ციხეში