საქართველოს მოქალაქეები და ავიაკომპანიების წარმომადგენლები სუდანში უსაფრთხო ადგილას იმყოფებიან. კომპანიების „ჯეო-სქაისა“ და „მაივეი ეარლაინსის“ წარმომადგენლების ცნობით, საქართველოს მოქალაქეები ამჟამად უზრუნველყოფილნი არიან წყლით და საკვებით. მათ გრაფიკით მიეწოდებათ ელექტროენერგია.

კომპანიის წარმომადგენლებს, საგარეო საქმეთა სამინისტროსთან ერთად, მუდმივი კონტაქტი აქვთ მოქალაქეებთან. მათი თქმით, ისინი ელოდებიან სუდანში ვითარების სტაბილიზაციას, რათა ქართველები სამშობლოში დააბრუნონ.

სუდანში ცეცხლის შეწყვეტის რეჟიმი რამდენჯერმე დაირღვა. ტელეკომპანია „ალ ჯაზირას“ ინფორმაციით, ქვეყნის დედაქალაქ ხარტუმში ინტენსიური შეტაკებები შეწყდა, თუმცა სროლის ხმა მაინც ისმოდა.