„აშშ-ის სახელმწიფო მდივანმა მარკო რუბიოს თქმით, ევროპელი ლიდერები არა მხოლოდ იმას პროგნოზირებენ, რომ რუსეთ-უკრაინის ომი სულ ცოტა ერთი წელი გაგრძელდებაო, არამედ, ისიც მისი თქმით, ის ევროპელი ლიდერები, რომლებიც საჯარო განცხადებებში თითქოს მშვიდობას უჭერენ მხარს, მასთან დახურულ შეხვედრებზე პირდაპირ ამბობენ, რომ ეს ომი არავითარ შემთხვევაში არ უნდა დასრულდეს“, - ამის შესახებ მედიასთან „ხალხის ძალის“ თავმჯდომარემ და პარლამენტის ვიცე-სპიკერმა სოზარ სუბარმა განაცხადა.
სოზარ სუბარის თქმითვე, უკრაინელი მაღალჩინოსნების დამოკიდებულებაც ამ ომის მიმართ მხოლოდ იმას აჩვენებს, რომ მათ საკუთარი ქვეყნისა და ხალხის მიმართ პასუხისმგებლობა არ გააჩნიათ.
„რუბიომ არ დაასახელა კონკრეტული პოლიტიკოსები, მაგრამ, გასაგებია, რომ ის მეორეხარისხოვან პოლიტიკოსებს არ შეხვდებოდა. ვისაც ხვდება, ისინი არიან გადაწყვეტილების მიმღები პირები - ან ევროპის ქვეყნების ლიდერები, ან, სულ ცოტა, საგარეო საქმეთა მინისტრები. შესაბამისად, ჩანს რომ ევროპელი პოლიტიკოსების მნიშვნელოვანი ნაწილი რუსეთ-უკრაინის ომის გაგრძელებას ემხრობა, დღესაც ვკითხულობდი ერთ-ერთ უკრაინულ ვებგვერდზე უკრაინელი მაღალი თანამდებობის მქონე პირების განცხადებებს, რომლებიც აღიარებდნენ, რომ მართალია რუსეთი ბრძოლის ველზე წინ მიიწევს, მაგრამ ისეთი ნელი ტემპით, რომ 118 წელი დასჭირდება უკრაინის მთლიანად დასაპყრობადო. ამით თავის დამშვიდება, მაშინ, როცა ყოველდღიურად ათასობით ადამიანი იღუპება და ქალაქ-სოფლები ნადგურდება, საკუთარი ქვეყნისა და მოსახლეობის მიმართ გაუგებარი უპასუხისმგებლობა და ცინიზმია“, - განაცხადა სოზარ სუბარმა.
0
0
