სომხეთისა და აზერბაიჯანის პრემიერ-მინისტრები ნიკოლ ფაშინიანი და ალი ასადოვი აბრეშუმის გზის მეოთხე საერთაშორისო ფორუმში მიიღებენ მონაწილეობას, რომელიც თბილისში 26-27 ოქტომბერს გაიმართება. ამის შესახებ ღონისძიების ოფიციალური ვებგვერდი იტყობინება.

ფორუმის სხვა მონაწილეებს შორის არიან „აზიის განვითარების ბანკის“ ვიცე-პრეზიდენტი რობერტა კასალი, აზერბაიჯანის ეკონომიკის მინისტრი მიკაილ ჯაბაროვი, სერბეთის ვაჭრობის მინისტრი ტომისლავ მომიროვიჩი, არაბეთის გაერთიანებული საამიროების საგარეო ვაჭრობის საკითხებში სახელმწიფო მინისტრი თანი ბინ აჰმედ ალ ზეიუდი, სპარსეთის ყურის არაბული ქვეყნების თანამშრომლობის საბჭოს გენერალური მდივანი ჯასიმ მოჰამედ ალ-ბუდაივი, USAID-ის ევროპისა და ევრაზიის ბიუროს უფროსი ერინ ელიზაბეტ მაკკი.

ფორუმს საქართველოს პრემიერ-მინისტრი ირაკლი ღარიბაშვილი გახსნის.

აბრეშუმის გზის ფორუმი ადრე საქართველოში 2015, 2017 და 2019 წლებში გაიმართა. წელს ღონისძიებას 60 ქვეყნიდან ორ ათასამდე დელეგატი დაესწრება, მათ შორის ცნობილი ჟურნალისტები, საერთაშორისო ორგანიზაციებისა და კერძო სექტორის წარმომადგენლები. ფორუმი ფოკუსირებული იქნება ისეთ საკითხებზე, როგორიცაა ვაჭრობის ხელშეწყობა, ელექტრონული კომერციის განვითარება, ციფრული კომუნიკაციები, სატრანსპორტო ინფრასტრუქტურა და ენერგეტიკა.