სომხეთის პრემიერ-მინისტრმა ნიკოლ ფაშინიანმა უწყებებს დაავალა აღადგინონ თანამშრომლობა რუსეთთან და "აქტიური მონაწილეობა მიიღონ ერთობლივ ღონისძიებებში". ამის შესახებ ინფორმაციას ადგილობრივი გაზეთი Hraparak წყაროებზე დაყრდნობით ავრცელებს. 

გამოცემის ცნობით, ეს ბრძანება გაცემულია „ბოლო გეოპოლიტიკური ცვლილებების ფონზე“.

გაზეთი აღნიშნავს, რომ გასულ კვირას, ნიკოლ ფაშინიანმა მიიღო ვლადიმერ პუტინის მიწვევა მოსკოვში 9 მაისის აღლუმზე დასწრების შესახებ. კრემლმა 14 მარტს განაცხადა, რომ სომხეთის პრემიერ-მინისტრი დათანხმდა ჩასვლას მათი სატელეფონო საუბრის შემდეგ. სომხური მხარის განცხადებაში კი ამის შესახებ საუბარი არ არის. მოგვიანებით სომხეთის პარლამენტის თავმჯდომარემ, ალენ სიმონიანმა განაცხადა, რომ არ იცის, წავა თუ არა ნიკოლ ფაშინიანი მოსკოვში.