პოლონეთის საგარეო საქმეთა მინისტრმა, რადოსლავ სიკორსკიმ განაცხადა, რომ ევროპა უნდა მონაწილეობდეს უკრაინასა და რუსეთს შორის მოლაპარაკებების პროცესში, რომელსაც აშშ ხელმძღვანელობს.

პოლონეთის საგარეო საქმეთა მინისტრმა გამოხატა აღშფოთება იმის გამო, რომ ევროპელები არ არიან ჩართულნი სამმხრივ ფორმატში მიმდინარე მოლაპარაკებების პროცესში, რომელიც ამ წლის დასაწყისში გააქტიურდა.

სიკორსკის თქმით, სწორედ ევროპა ფარავს უკრაინის თავდაცვის ხარჯების დიდ ნაწილს.

„ეს ცოტა უცნაური ხდება. ჩვენ ვიხდით ომისთვის და ყოველთვის სრულ ინფორმაციასაც კი არ ვფლობთ. ჩვენ ვხარჯავთ რეალურ ფულს, მაშინ როცა აშშ, ფაქტობრივად, შოულობს ამ ომით“, - განაცხადა მინისტრმა. იგი გულისხმობდა PURL-ის ინიციატივას, რომლის ფარგლებშიც ნატო-ს წევრი ქვეყნები უკრაინისთვის იარაღს აშშ-ში ყიდულობენ.

„ეს გვაძლევს ხმის უფლებას შეთანხმებებსა და შედეგებთან დაკავშირებით“, - დასძინა მან.

სიკორსკის თქმით, ევროკავშირმა უკრაინის თავდაცვისთვის ბოლო ორი წლის განმავლობაში უკვე დახარჯა 200 მილიარდ ევროზე მეტი, ხოლო შემდგომში, ახალი სესხის ფარგლებში, კიდევ 90 მილიარდს გამოყოფს.