31 წლის მამაკაცი, რომელმაც მამას ყელი გამოჭრა, გიორგი მენთეშაშვილია. შემზარავი დანაშაული 8 აპრილს მოხდა. 

პოლიციამ გიორგი მენთეშაშვილი ცხელ კვალზე მალევე დააკავა. ბრალდებული იმ დროს აიყვანეს, როდესაც მიმალვას ცდილობდა. 

“კურიერის” ინფორმაციით, ბრალდებული გამოკითხვის ოქმში მიმალვის მცდელობაზე ყვება. იხსენებს, რომ მეუღლეს დაემშვიდობა და დანაშაულის ადგილი მკვლელობის იარაღით დატოვა. დაკავებამდე გიორგი მენთეშაშვილმა დანა ბუჩქებში გადააგდო, თუმცა მოგვიანებით სამართალდამცველებს სამალავზე თავად მიუთითა.

არსებული ინფორმაციით, დანაშაულის დღეს, მამა შვილისგან ეზოს დასუფთავებას მოითხოვდა და ჩხუბიც ამას მოჰყვა. დაპირისპირებას, რომელიც მკვლელობით დასრულდა, მოკლულის და დაკავებულის მეუღლეებიც შეესწრნენ. ამ დროს, სახლში იყვნენ ბრალდებულის მცირეწლოვანი შვილებიც. ოჯახის წევრები და მეზობლები საგამოძიებო უწყებამ უკვე გამოკითხა.

მოკლულის ცხედარი ჩატარებული ექსპერტიზის შემდეგ, სახლში გადაასვენეს. ცნობილია, რომ გარდაცვლილს თავისა და სხეულის სხვადასხვა არეში, რამდენიმე ღრმა ჭრილობა აღენიშნება.

გიორგი მენთეშაშვილს აღკვეთის ღონისძიებად პატიმრობა უკვე შეეფარდა. 31 წლის მამაკაცი ამ ეტაპზე დუმილის უფლებას იყენებს. ადვოკატი დეტალებზე არ საუბრობს, თუმცა საბრალდებო მუხლის გადაკვალიფიცირების მოლოდინი აქვს.

შინაგან საქმეთა სამინისტრომ გამოძიება ოჯახის წევრის განზრახ მკვლელობის მუხლით დაიწყო. წინასასამართლო სხდომამდე, სავარაუდოდ ჩატარდება სხვადასხვა სახის ექსპერტიზა, მათ შორის ფსიქიატრიული. 

მამის განზრახ მკვლელობისთვის დაკავებულ 31 წლის გიორგი მენთეშაშვილს ბრალის დამტკიცების შემთხვევაში 16-20 წლამდე ან უვადო პატიმრობა ემუქრება.