თბილისის საზოგადოებრივ ტრანსპორტში სამგზავრო გადახდის სისტემაზე სავარაუდო კიბერშეტევასთან დაკავშირებით შინაგან საქმეთა სამინისტრომ გამოძიება დაიწყო. როგორც უწყებაში აცხადებენ, გამოძიება დაწყებულია სსკ-ს 284-ე მუხლით, რაც კომპიუტერულ სისტემაში უნებართვო შეღწევას გულისხმობს.

დანაშაული ისჯება ჯარიმით ან გამასწორებელი სამუშაოთი ვადით ორ წლამდე, ან თავისუფლების აღკვეთით, იმავე ვადით.

ამ დროისთვის საზოგადოებრივ ტრანსპორტში სამგზავრო გადახდის სისტემა აღდგა. 

დღეს დილიდან თბილისის ავტობუსებისა და მიკროავტობუსებში გადახდის აპარატებიდან პროტესტის ხმა ისმოდა - ჩართული იყო საპროტესტო ლოზუნგები, პოლიტიკოსების განცხადებები, საქართველოს და ევროკავშირის ჰიმნები, სიმღერები.

თბილისის მერის კახა კალაძის განცხადებით, სავარაუდოდ, კიბერშეტევა განხორციელდა და მომხდარს გამოძიება დაადგენს.