ჯაბა სამუშია თბილისის სახელმწიფო უნივერსიტეტის წარმატებულ სტუდენტებს შეხვდა. თსუ რექტორის მოვალეობის შემსრულებელი 778 სახელმწიფო სტიპენდიატ სტუდენტს უნივერსიტეტის სამომავლო გეგმებსა და საუნივერსიტეტო ცხოვრებაში მათი ჩართულობის მნიშვნელობაზე ესაუბრა. 

პროგრამა „სახელმწიფო სტიპენდია სტუდენტებს“ საქართველოს განათლებისა და მეცნიერების მინისტრის ბრძანებით 2013 წლიდან გაიცემა. ტრადიციულად, წელსაც, სხვა უმაღლეს სასწავლებლებთან შედარებით, ყველაზე მეტი დაფინანსება თბილისის სახელმწიფო უნივერსიტეტმა მიიღო.
 

„ეს ჩვენი სტუდენტების ძალიან მნიშვნელოვანი წარმატებაა. თსუ-ში ყველაზე მეტი სტიპენდიატია. შეხვედრაზე მათ წარვუდგინე ჩემი ხედვა უნივერსიტეტის განვითარებასთან დაკავშირებით. სტუდენტებმა დასვეს შეკითხვები, საკმაოდ კრიტიკული კითხვებიც. მე დავპირდი მათ, რომ მომავალშიც გვექნება დიალოგის რეჟიმი სტუდენტებთან, ჩვენს მომავალ თაობასთან უნივერსიტეტის საკეთილდღეოდ,“-განაცხადა ჯაბა სამუშიამ.
 

სტიპენდია გათვალისწინებულია ბაკალავრიატის საფეხურის ან დიპლომირებული მედიკოსის სტომატოლოგის საგანმანათლებლო პროგრამის სტუდენტებისთვის. სტიპენდიის მოპოვებაში გადამწყვეტი მნიშვნელობა აქვს აკადემიურ მოსწრებას (100 ქულიანი შეფასების სისტემით 80-95 ქულა ფაკულტეტების მიხედვით). 

აგრეთვე, ყურადღება ექცევა სამეცნიერო აქტივობას: ნაშრომების გამოქვეყნებას, კონფერენციებში მონაწილეობას. შეხვედრის დროს სტუდენტებს საშუალება ჰქონდათ დაესვათ კითხვები და აღენიშნათ ის საჭიროებები, რომელიც ამ ეტაპზე გააჩნიათ.
 

„როგორც სტუდენტისთვის, ძალიან მნიშვნელოვანი იყო ეს შეხვედრა. რექტორის უშუალო ჩართულობა, ასეთი დამოკიდებულება არის ძალიან მნიშვნელოვანი სტუდენტების დიდი ნაწილისათვის. მან გაამახვილა ყურადღება სტუდენტების საჭიროებებზე და ვფიქრობ, რომ სამომავლოდ ამ ყველაფერს შეასრულებს,“ განაცხადა სოციალურ და პოლიტიკურ მეცნიერებათა ფაკულტეტის სტუდენტმა თამარ ბიბიჩაძემ.