რუსთაველის თეატრში, მსახიობ ჯემალ ღაღანიძის სამოქალაქო პანაშვიდი გაიმართა. მსახიობი ამავე თეატრიდან უკანასკნელ გზაზე აპლოდისმენტებით გააცილეს.

სცენაზე გატარებული 65 წელი, გამორჩეული და განსხვავებული სამსახიობო ოსტატობის წყალობით ჯემალ ღაღანიძემ მაყურებელს თავი განსაკუთრებით შეაყვარა.

1956 წლიდან, თბილისის სახელმწიფო თეატრალური ინსტიტუტის სამსახიობო ფაკულტეტის დამთავრების შემდეგ, სიცოცხლის ბოლომდე იყო რუსთაველის თეატრის მსახიობი. ჯემალ ღაღანიძე იყო კოტე მარჯანიშვილის სახელობის პრემიის, ღირსების ორდენის და იპოლიტე ხვიჩიას სახელობის პრიზის მფლობელი.

2011 წელს კი მსახიობს რუსთაველის თეატრის წინ, ვარსკვლავი გაუხსნეს. ჯემალ ღაღანიძე 3 თებერვალს, 89 წლის ასაკში გარდაიცვალა. მას დღეს საბურთალოს სასაფლაოზე დაკრძალავენ.