„ლისი დეველოპმენტი“ ობლიგაციების მფლობელთა შეცდომაში შეყვანას აღიარებს და ობლიგაციების ვადამდე განაღდებას სთავაზობს - ამ უწყინარი ამბის უკან სავარაუდოდ დიდი თაღლითური სქემაა დალაგებული, - ამის შესახებ ექსპერტი ლევან ნიკოლეიშვილი სოციალურ ქსელში წერს.

ნიკოლეიშვილი ეჭვობს, რომ საქმე ეხება თაღლითურ სქემას, რომელიც სისხლის სამართლის დანაშაულია

. მისი განცხადებით, ამ თემის ირგვლივ ბევრი კითხვა არსებობს, რომლებსაც მამუკა ხაზარაძემ და ბადრი ჯაფარიძემ პასუხები უნდა გასცენ.

„ხაზარაძე / ჯაფარიძის მორიგი თაღლითობა?! „ლისი დეველოპმენტი“ ობლიგაციების მფლობელთა შეცდომაში შეყვანას აღიარებს და ობლიგაციების ვადამდე განაღდებას სთავაზობს - ამ უწყინარი ამბის უკან სავარაუდოდ დიდი თაღლითური სქემაა დალაგებული. რადგან ამ ამბის უკან ხომ ხანდაზმული თაღლითები, ხაზარაძე და ჯაფარიძეზე დგანან. საქმე ისაა, რომ მათმა კომპანიამ, რომელსაც ფიგურალურად შვილები მართავენ. თუმცა რეალურად ყველაფერს თავად განაგებენ, ობლიგაციების მფლობელები "გადაყარა" და არავინ იცის რა და როგორ დასრულდებოდა, ეს ამბავი მალევე რომ არ გამსკდარიყო.

ამ ამბავს არც ბოდიშის მოხდა უშველის და არც თანხის ანაზღაურება, რადგან ეჭვი მაქვს, საქმე ეხება თაღლითურ სქემას, რომელიც სისხლის სამართლის დანაშაულია. როგორც მინიმუმ - ხაზარაძე / ჯაფარიძემ პასუხი უნდა გასცენ კითხვას, რატომ მოატყუეს ბონდების მფლობელები, აუდიტორულმა კომპანიამ პასუხი უნდა გასცეს კითხვას, რატომ შეაფასა კომპანია იმაზე ბევრად ძვირად, ვიდრე ღირდა, რამაც ათეულობით ადამიანის მოტყუება გამოიწვია. დაბოლოს სახელმწიფომ უნდა გაარკვიოს ეს იყო კომპანიასა და აუდიტორებს შორის თაღლითური გარიგება თუ კომპანიამ მიაწოდა იმთავითვე მცდარი ინფორმაცია აუდიტორებს. კითხვა ბევრია - რომელსაც პასუხები სჭირდება, რადგან ამ ორი თაღლითისგან გამწარებული ბევრი ადამიანის სახელი და გვარი ვიცით!“ - წერს ლევან ნიკოლეიშვილი Facebook-ზე.

კომპანია „ლისი ლეიქ დეველოპმენტის“ განცხადებით, აუდიტორული კომპანია „Ernst & Young“-ის მიერ შემოწმების შედეგად, კომპანიის ფინანსური ანგარიშგებასთან დაკავშირებით არსებითი ხარვეზები/შეცდომები გამოიკვეთა, რამაც მნიშვნელოვანი გავლენა იქონია კომპანიის მიერ გამჟღავნებულ ფინანსურ მონაცემებზე.

განცხადების მიხედვით ემიტენტი ობლიგაციების მფლობელებს სთავაზობს ობლიგაციების ვადამდე განაღდებას მათი მხრიდან სურვილის გამოხატვის შემთხვევაში, შემდეგი პირობებით:

• ემიტენტი ნაადრევად გამოსყიდვასთან დაკავშირებით განაცხადებს მიიღებს 2024 წლის 1-ეოი თებევრლიდან 14 თებევრლის ჩათვლით. განაცხადების მიღების ვადის ამოწურვიდან 5 კალენდარული დღის ვადაში ემიტენტი უზრუნველყოფს მიღებული მოთხოვნების დაკმაყოფილებას

• გამოსყიდვა განხორციელდება გამოსყიდვის თარიღისთვის არსებული ძირითადი თანხის (ნომინალის) 100 პროცენტისა და დარიცხული საპროცენტო სარგებლის გადახდით

• განაცხადების წარდგენა უნდა განხორციელდეს „გალტ ენდ თაგარტთან“ (რომელიც წარმოადგენს აღნიშნულ ფასიანი ქაღალდებთან დაკავშირებით ემიტენტის „განთავსების აგენტს“ და „გადახდისა და კალკულაციების აგენტს“) შემდეგ ელ-ფოსტაზე: sales@gt.ge.